"Azərbaycan İlahiyyat İnstitutunun (Aİİ) bu il 59 tələbəsi məzun olur".
Oxu.Az xəbər verir ki, bunu Azərbaycan İlahiyyat İnstitutunun rektoru Aqil Şirinov bu gün keçirilən məzun günündə jurnalistlərə açıqlamasında deyib.
O bildirib ki, məzunların 55-i bakalavriat, dördü isə magistratura səviyyəsində təhsilini başa vurub.
Rektorun sözlərinə görə, magistratura məzunlarından ikisi xarici ölkə vətəndaşıdır:
"Bu, Azərbaycan İlahiyyat İnstitutunda təkcə ölkəmizdən deyil, xaricdə yaşayan soydaşlarımızın da təhsil aldığını göstərən müsbət göstəricidir".
O bildirib ki, bu il ilk dəfə olaraq Aİİ-nin nəzdində fəaliyyət göstərən Bakı İlahiyyat Kolleci də məzunlarını yola salır. Kollecin 15 məzunu var.
Aqil Şirinov qeyd edib ki, institutun məzunları müxtəlif dövlət qurumlarında, eləcə də dini ocaqlarda imam, imam müavini və dini ayinlərin icraçısı kimi fəaliyyət göstərirlər. Onlar həmçinin Dini Qurumlarla İş üzrə Dövlət Komitəsi və onun nəzdində fəaliyyət göstərən Mənəvi Dəyərlərin Təbliği Fondunda işlə təmin olunmaq imkanı əldə edirlər.
Rektor vurğulayıb ki, Azərbaycan İlahiyyat İnstitutunun əsas məqsədi din sahəsində peşəkar, dövlətçilik prinsiplərinə sadiq və vətənpərvər kadrlar hazırlamaqdır:
"Azərbaycan İlahiyyat İnstitutunda əsas məqsəd dini mühitimizi qoruyacaq, tolerantlıq və multikulturalizm ənənələrinə sadiq mütəxəssislər yetişdirməkdir".
O əlavə edib ki, Bakı İlahiyyat Kolleci dini təhsildə ardıcıllığın təmin olunması məqsədilə yaradılıb və kolleci bitirən tələbələr təhsillərini daha yüksək səviyyədə Azərbaycan İlahiyyat İnstitutunda davam etdirə bilirlər.
