Sumqayıt şəhər Polis İdarəsi tərəfindən axtarışda olan Babək Bağırov yaxalanıb.
Oxu.Az APA TV-yə istinadən xəbər verir ki, yaşayış yerini tez-tez dəyişən 25 yaşlı B.Bağırov bu il sentyabrın 17-dən axtarışdadır.
O, 5 nəfərin ölümü, 6 nəfərin yaralanması ilə nəticələnən yol qəzasını törətməkdə təqsirləndirilir.
Onun sürdüyü maşınla Bakı-Quba yolunun Sumqayıt şəhəri ərazisində 22 yaşlı Anar Məmmədovun idarə etdiyi “Volkswagen Passat” və Yusif Məmmədovun idarə etdiyi “Azsamand” markalı avtomobillər toqquşub.
Nəticədə onun maşını aşır, sərnişinləri Qismət Kərimov, Rəşad Cəlilov və daha 3 nəfər hadisə yerində ölür.
25 yaşlı Babək Bağırov qoruyucu yastıqların acılması nəticəsində sağ qaldığından avtomobilini, eləcə də dostlarını orada qoyub hadisə yerindən uzaqlaşır. Müstəntiqin “avtomobilinizdə neçə sərnişin var idi” sualına təqsirləndirilən şəxsin cavabı belə olub:
“Neçə sərnişin var idi, bilmirəm. Oturacaqların sayı qədər”.
Saxlanılan şəxs güləşçi olduğunu, ölkəyə qızıl medal gətirdiyini, erməniyə qalib gəldiyini və nahaqdan tutulduğunu bildirib.
Sözügedən hadisə nəticəsində 5 nəfər ölüb, 6 nəfər ağır bədən xasərəti alıb. Faktla bağlı CM-nin 263-ci (2 iki və daha artıq şəxsin ölümü ilə nəticələnən yol nəqliyyat hadisəsi törətdikdə) maddəsi ilə cinayət işi açılıb.
