Fövqəladə Hallar Nazirliyinin Xüsusi Riskli Xilasetmə Xidmətinin Kinoloji Taboru 2007-ci ildən fəaliyyət göstərir.
Tabor əhalinin və ərazilərin fövqəladə hallardan qorunması və belə halların nəticələrinin aradan qaldırılması zamanı xüsusi təlim keçmiş xidməti-axtarış itlərindən istifadə etməklə xilasetmə, axtarış və digər işləri həyata keçirir.
Kinoloji Tabor, əsasən, beş istiqamətdə fəaliyyət göstərir: mühafizə itləri, canlı insan axtarışı, cəsəd axtarışı, partlayış təhlükəli maddələrin axtarışı, işğaldan azad olunan ərazilərdə mina axtarışı. Burada yetişdirilən itlər onların təyinatı xarakterinə və temperamentinə görə müəyyən olunur.
İlkin mərhələdə xidməti itlərə sosiallaşma öyrədilir. Bu mərhələdə itlərin insanlara və müxtəlif obyektlərə uyğunlaşması təmin edilir. Daha sonra itaət komandaları tədris olunur ki, itlər əmrlərə dəqiq və sürətlə reaksiya verə bilsinlər. İtaət mərhələsi tamamlandıqdan sonra itlər xüsusi təlimlərə cəlb edilir. Taborda təlimlər xüsusi ayrılmış ərazilərdə keçirilir. Bu ərazilərdə itlərin təlim keçməsi üçün qayalıq, meşəlik-otluq, uçqun, avtomobil dayanacağının əvəzedicisi və digər təbii və süni maneələr yaradılıb. İtlərin saxlanıldıqları yerlər təmizdir və onların qidalanması yüksək səviyyədə təmin edilir. İtlər hər gün müayinədən keçdikdən sonra təlimlərə başlayır. Təlimlərdə labradorlar, dobermanlar, alman çoban itləri və digər it cinslərindən istifadə olunur.
PhotoStock.az-ın əməkdaşı Kinoloji Tabordan fotoreportaj hazırlayıb:
Daha çox foto burada: PhotoStock.Az
