Bakının əsas prospektlərindən birində sürət həddinin endirilməsi ilə bağlı RƏSMİ AÇIQLAMA - YENİLƏNİB + VİDEO

Dərnəgül yolu Ziya Bünyadov prospektində sürəti həddinin endirilməsi ilə bağlı məsələyə münasibət bildirilib.

Məsələ ilə bağlı Oxu.Az-a açıqlama verən Bakı Şəhər Baş Dövlət Yol Polisi İdarəsinin baş inspektoru Araz Əsgərli paytaxt ərazisində bir sıra küçə və prospektlərdə maksimal sürət həddinin endirilməsinin aidiyyəti dövlət orqanlarının birgə rəyi əsasında həyata keçirildiyini vurğulayıb:

“Sürət həddinin endirilməsi yol-nəqliyyat hadisələrinin fəsadlarının daha ağır olmaması və vaxtında qarşısını almaq məqsədi güdür. Hər bir sürücüdən yollarda nəzərdə tutulmuş sürət həddinə ciddi şəkildə riayət etməyi, yol-nəqliyyat hadisələrinin baş verməməsi üçün təhlükəsizliyə təminat verəcəyi formada nəqliyyat vasitəsini idarə etməyi tövsiyə edirik”.

14:22

Ziya Bünyadov prospektində sürət həddi 90 km/saatdan 70 km/saata endirilib.

Oxu.Az xəbər verir ki, bununla bağlı görüntülər sosial şəbəkələrdə yayılıb. Kadrlarda sözügedən yolda sürət həddinin endirilməsi ilə bağlı yol nişanlarının da quraşdırıldığı görünür.

Həmin görüntüləri təqdim edirik:

Nəzrin Vahid