Ali məktəbə qəbul zamanı ixtisas seçimi gələcək üçün verilən ən mühüm qərarlardan biridir. Burada edilən yanlışlar səbəbindən bəzi məzunlar təhsil aldıqları ixtisas üzrə deyil, iş mühitinə və tələblərə uyğunlaşmaq məqsədilə fərqli sektorlara yönəlirlər.
Gənclər hansı səbəblərdən təhsil aldıqları sahəni dəyişirlər?
Təhsil eksperti Məzahir Məmmədli mövzu ilə bağlı Oxu.Az-a danışıb. O bildirib ki, keçirilən qəbul imtahanlarında ayrıca ixtisas üzrə bir sual belə yoxdur:
"Həmçinin, məlumdur ki, magistratura pilləsinə qəbul zamanı 100 ballıq sualların 50-si məntiq, 25-i informatika, qalan 25-i isə xarici dil fənni üzrə tərtib olunur. Eyni zamanda, xarici dil fənnindən beş ballıq şkala ilə qiymətləndirilən esse yazılması tələb edilir. Qarşıdakı illərdə bu prosesin daha da mürəkkəbləşməsi ehtimalı var. Nəzərə almaq lazımdır ki, heç bir abituriyent belə çətin prosesdən keçməyi arzulamır.
İllər əvvəl tələbələr ixtisaslarından asılı olmayaraq, tamamilə fərqli sahələr üzrə magistratura təhsili ala bilirdilər. Lakin artıq belə imkan yoxdur. Onlar yalnız bitirdikləri ixtisas üzrə təhsillərini davam etdirə bilirlər. Bu da magistratura pilləsində boş yerlərin daha çox qalmasının səbəbini izah edir.
Məsələnin həlli ilə bağlı Nazirlər Kabineti və Elm və Təhsil Nazirliyinin aidiyyəti agentliyi planlı şəkildə təkliflər hazırlamalıdırlar. Çünki magistratura pilləsinə gələcəkdə elmlə məşğul olmağı planlaşdıran və müəyyən karyera yüksəlişi hədəfləyən şəxslər müraciət edirlər".
Təhsil eksperti Elçin Muradovun fikrincə, tələbələrin sonradan ixtisaslarını dəyişməsinin üç əsas səbəbi var:
"Birinci səbəb bakalavr səviyyəsində istədikləri ixtisasa qəbul ola bilmədikləri üçün magistraturada arzuladıqları sahəni seçmək istəyidir. İkincisi, magistratura səviyyəsində beynəlxalq səviyyədə tanınan və gələcəkdə xaricdə işləmək imkanı yaradan diplom əldə etmək arzusudur. Üçüncü amil isə əmək bazarı ilə bağlıdır. Bakalavr pilləsində oxuduqları ixtisasın iş tapmaq üçün yetərli olmaması onları magistraturada fərqli sahəyə yönəlməyə məcbur edir.
Ümumilikdə, bu halı müsbət qiymətləndirmək mümkündür. Çünki iki fərqli sahə üzrə yetişmiş kadrların olması əmək bazarı üçün daha əlverişlidir. İş mühitində ehtiyac yarandığı təqdirdə, onlar hər iki ixtisas üzrə qazandıqları bilik və bacarıqlardan istifadə edə bilərlər".
Laləzər Məmmədova
