"Bakıda keçirilən Ümumdünya Şəhərsalma Forumunun (WUF13) uğurla başa çatması Azərbaycanın beynəlxalq nüfuzunun, qlobal təşəbbüslərdə fəal iştirakının və irimiqyaslı tədbirlərə yüksək səviyyədə ev sahibliyi imkanlarının növbəti dəfə nümayişi oldu".
Bu fikirləri Oxu.Az-a açıqlamasında Milli Məclisin deputatı Ceyhun Məmmədov deyib.
Deputat bildirib ki, WUF13 iştirakçı sayı və miqyası baxımından forum tarixinin ən böyük sessiyası kimi yadda qalıb:
"Ümumdünya Şəhərsalma Forumunun 13-cü sessiyası 176 ölkədən 57 mindən çox iştirakçını bir araya gətirməklə bu platformanın tarixində ən genişmiqyaslı tədbir oldu. COP29-dan sonra Azərbaycanda keçirilən ikinci ən böyük beynəlxalq tədbir olan WUF13 ölkəmizin qlobal problemlərin həllində etibarlı tərəfdaş kimi artan rolunu bir daha nümayiş etdirdi.
Belə nüfuzlu tədbirin Azərbaycanda keçirilməsi ölkəmizin beynəlxalq arenadakı mövqeyinin, ona olan etimadın və çoxtərəfli əməkdaşlığın təşviqində oynadığı rolun göstəricisidir. Eyni zamanda, bu forum Azərbaycanın qlobal əhəmiyyətli və genişmiqyaslı tədbirlərin təşkili sahəsində formalaşdırdığı təcrübəni və yüksək potensialını bir daha ortaya qoydu".
C.Məmmədovun sözlərinə görə, forum çərçivəsində ilk dəfə keçirilən Liderlərin Sammiti xüsusi əhəmiyyət daşıyıb:
"Prezident İlham Əliyevin təşəbbüsü ilə Ümumdünya Şəhərsalma Forumu tarixində ilk dəfə Liderlərin Sammitinin keçirilməsi diqqətçəkən məqamlardan biri oldu. Sessiyada 27 dövlət və hökumət başçısı, beynəlxalq təşkilatların rəhbərləri və digər yüksəksəviyyəli qonaqlar iştirak etdilər.
Çıxışlar zamanı Azərbaycanın qonaqpərvərliyi, forumun yüksək səviyyədə təşkili və beynəlxalq dialoq üçün yaradılmış əlverişli mühit xüsusi vurğulandı. Liderlərin Azərbaycana ünvanladıqları təşəkkür və müsbət fikirlər ölkəmizin beynəlxalq nüfuzunun göstəricisidir.
Bu sessiya həm də Azərbaycanın strateji dialoq, beynəlxalq əməkdaşlıq və qlobal təşəbbüslərin təşviqi üçün mühüm platformaya çevrildiyini göstərdi. Forumun siyasi əhəmiyyəti daha da artdı və Azərbaycan mühüm beynəlxalq məsələlər ətrafında müxtəlif ölkələri bir araya gətirmək qabiliyyətini bir daha nümayiş etdirdi".
Deputat Nazirlər Görüşünün nəticələrinin də xüsusi önəm daşıdığını qeyd edib:
"Forum çərçivəsində keçirilən Nazirlər Görüşündə 70-ə yaxın ölkəni təmsil edən nazirlər və nazir müavinləri iştirak etdilər. Görüşün yekununda qəbul olunan "Sədrin xülasəsi" sənədində bir sıra mühüm məqamlar öz əksini tapdı.
Sənəddə Prezident İlham Əliyevin liderliyi xüsusi vurğulandı, WUF13-ün forum tarixinin ən böyük sessiyası olduğu qeyd edildi, Azərbaycan hökumətinə və xalqına qonaqpərvərlik və uğurlu təşkilatçılığa görə minnətdarlıq ifadə olundu. Eyni zamanda, forumun hazırlanması zamanı tətbiq olunan innovativ yanaşmalar, ilk dəfə keçirilən Liderlərin Sammiti və Azərbaycanla BMT-nin Məskunlaşma Proqramı (UN-Habitat) arasında gələcək əməkdaşlıq təşəbbüsləri yüksək qiymətləndirildi".
Millət vəkili Azərbaycanın postmünaqişə dövründə həyata keçirdiyi bərpa-quruculuq işlərinin forum iştirakçıları tərəfindən maraqla qarşılandığını bildirib:
"Azərbaycan işğaldan azad edilmiş ərazilərdə həyata keçirdiyi genişmiqyaslı bərpa və yenidənqurma təcrübəsini dünya ictimaiyyəti ilə bölüşdü. Bu gün ölkəmiz öz maliyyə və insan resursları hesabına urbisidə, ekosidə və kultursidə məruz qalmış şəhər və kəndləri yenidən qurur.
Doqquz şəhərin və yüzdən artıq kəndin yenidən inşası, keçmiş məcburi köçkünlərin doğma torpaqlarına təhlükəsiz və ləyaqətli qayıdışını təmin edən "Böyük Qayıdış" proqramı, eləcə də "ağıllı şəhər" və "ağıllı kənd" konsepsiyalarının tətbiqi beynəlxalq iştirakçılar tərəfindən böyük maraqla qarşılandı və yüksək qiymətləndirildi.
Xüsusilə vurğulandı ki, Azərbaycanın postmünaqişə bərpa modeli dünyada oxşar vəziyyətlə üzləşən ölkələr üçün faydalı təcrübə nümunəsi ola bilər".
C.Məmmədov forumun Azərbaycanın qlobal şəhərsalma gündəliyinə verdiyi töhfələrlə də yadda qaldığını deyib:
"WUF13 təkcə müzakirə platforması deyil, həm də konkret təşəbbüslər və yeni əməkdaşlıq imkanları yaradan mühüm beynəlxalq tədbir oldu. Azərbaycanın təşəbbüsü ilə Bakı Şəhər Mükafatının təsis edilməsi, müxtəlif beynəlxalq sənədlərin qəbul olunması və əməkdaşlıq mexanizmlərinin yaradılması bunun bariz nümunəsidir.
Forumun təşkili zamanı tətbiq edilən innovativ yanaşmalar da beynəlxalq səviyyədə yüksək qiymətləndirildi. Dövlət Şəhərsalma və Arxitektura Komitəsi ilə "UN-Habitat" arasında imzalanan Niyyət Məktubu gələcək Ümumdünya Şəhərsalma forumlarının təşkili üçün Bakı təcrübəsinin əsas götürülməsinə imkan yaradır.
Bütün bunlar göstərir ki, Azərbaycan artıq yalnız beynəlxalq tədbirlərə ev sahibliyi edən ölkə deyil, həm də qlobal səviyyədə yeni təşəbbüslər irəli sürən, qabaqcıl təcrübə formalaşdıran və beynəlxalq əməkdaşlığa töhfə verən mühüm tərəfdaşdır".
