"Qarşılaşdığımız əsas problemlərdən biri açıq dənizlərə çıxışımızın olmamasıdır. Buna görə də logistika kifayət qədər mürəkkəb bir prosesdir. Lakin layihələr göstərdi ki, müəyyən mürəkkəb və yüksək səviyyədə düşünülmüş logistik həlləri həyata keçirmək mümkündür".
Oxu.Az xəbər verir ki, bunu SOCAR-ın vitse-prezidenti Əfqan İsayev 31-ci Bakı Enerji Forumu çərçivəsində keçirilən panel müzakirədə bildirib.
Onun sözlərinə görə, geosiyasi məsələlər hər zaman çətinlik yaradır:
"Bu da insanların və şirkətlərin bu cür layihələri həyata keçirməsini daha da çətinləşdirir. Digər böyük çətinlik isə avadanlıq təchizatıdır. Hazırda enerjiyə olan tələbatı və onun sürətlə artmasını nəzərə alsaq, orijinal avadanlıq istehsalçılarının çoxsaylı layihələr üzrə tələb olunan sifarişləri vaxtında təmin edə bilməsi getdikcə daha çətinləşir. Əsas problemlər bunlardır. Lakin mən əminəm ki, həll edə biləcəyimiz başqa bir məsələ də var. Hazırkı mərhələdə dənizdə həyata keçiriləcək layihələr üçün müəyyən infrastruktur mövcuddur. Neft-qaz sənayesi göstərib ki, tərəfləri bir araya gətirməklə və məsələn, dənizdə bərpaolunan enerji imkanlarının inkişafında əməkdaşlıq etməklə böyük nəticələr qazana bilərik".
