"Daşkənd və Gəncə şəhərləri arasında birbaşa aviareysin açılması Azərbaycan ilə Özbəkistan arasında qardaşlıq və dostluq münasibətlərinin inkişafında mühüm hadisədir".
Oxu.Az xəbər verir ki, bu sözləri Özbəkistanın Azərbaycandakı fəxri konsulu Kənan Cəlilov öz sosial şəbəkə hesabında qeyd edib.
O, yeni aviareysin hər iki ölkənin vətəndaşlarının gediş-gəlişini asanlaşdırmaqla yanaşı, turizm, ticarət, investisiya, mədəni əməkdaşlıq və biznes əlaqələrinin genişlənməsinə əlavə imkanlar yaradacağını deyib.
"Xüsusilə sevindirici haldır ki, Azərbaycanın ən qədim və gözəl şəhərlərindən biri olan Gəncə artıq qardaş Özbəkistanın paytaxtı Daşkənd ilə birbaşa hava əlaqəsinə malikdir. İnanıram ki, bu marşrut xalqlarımızı daha da yaxınlaşdıracaq, ölkələrimiz arasında strateji tərəfdaşlığın möhkəmlənməsinə töhfə verəcək.
Bu layihənin həyata keçirilməsində əməyi olan hər kəsə təşəkkürümü bildirir, Azərbaycan və Özbəkistan xalqlarını bu əlamətdar hadisə münasibətilə ürəkdən təbrik edirəm", - deyə konsul bildirib.
Xatırladaq ki, Daşkənddən Bakı və Gəncəyə müntəzəm aviareyslər bu il iyunun 1-dən başlayıb.
