Hacıqabul sakini: "Sel gələndə divanda yatırdım, harada qalacağımı bilmirəm"

Oktyabrın 12-si səhər saatlarından başlayan güclü yağış Hacıqabul rayonunda selə səbəb olub. Sel suları xüsusilə rayon mərkəzində yerləşən evlərin həyətlərinə dolub. Evlərini tərk edən sakinlər onlara xeyli ziyan dəydiyini bildirirlər.

Hacıqabul sakini Namiq Hüseynov sel gələndə divanda yatdığını qeyd edib: "Gördüm, ayağıma su dəydi. Ev suyun içindədir. Harada qalacağımı bilmirəm".

Digər sakin Cəmaləddin Rüstəmov isə bildirib ki, sel suları dağlardan gəlir: "2009-cu ildə də bu cür təbii fəlakət olmuşdu".

Ətraflı Baku TV-nin süjetində.

Hacıqabul sakini: "Sel gələndə divanda yatırdım, harada qalacağımı bilmirəm"

12 oktyabr, 23:21

Fövqəladə Hallar Nazirliyinin (FHN) Mülki müdafiə qoşunlarının qüvvələri dərhal zəruri və təxirəsalınmaz tədbirlərin görülməsi üçün Hacıqabulda subasmaya məruz qalan ərazilərə cəlb olunublar.

Oxu.Az xəbər verir ki, bu barədə FHN-dən bildirilib.

Hazırda Nazirliyin qüvvələri tərəfindən subasmaya məruz qalmış ərazilərdən suyun çəkilərək kənarlaşdırılması, bəzi köməksiz vəziyyətdə qalan vətəndaşların təxliyəsi və digər zəruri təhlükəsizlik tədbirləri həyata keçirilir.

19:20

Hacıqabul rayonuna yağan leysan nəticəsində 300-dən çox ev su içində qalıb.

Bu barədə "Report"un Aran bürosuna Hacıqabul Rayon Fövqəladə Hallar Komissiyasının sədri Saleh Ələsgərov məlumat verib.

Onun sözlərinə görə, yağış rayonda bir sıra fəsadlar törədib.

Rayon mərkəzi də daxil olmaqla, Qızılburun, Atbulaq, Qubalı-Baloğlan, Pisaat və Nəvahi kəndləri ciddi zərər çəkib.

Hacıqabulun mərkəzində elektrik verilişi dayandırılıb.

Hazırda təbii fəlakətin nəticələrinin aradan qaldırılması üçün FHN-in Muğan Regional Mərkəzinin texnika və canlı qüvvəsi hadisə yerinə cəlb olunub. Həyətlərdən suların çəkilməsi istiqamətində lazımi tədbirlər görülür.

Hacıqabul sakini: "Sel gələndə divanda yatırdım, harada qalacağımı bilmirəm"

17:42

Hacıqabul rayonuna aramsız yağan yağışlar fəsadlara səbəb olub.

APA xəbər verir ki, nəticədə 200-ə yaxın evi su basıb.

Rayon ərazisindən keçən dəmir yolu xəttinə zərər dəyib. Hazırda qatarların hərəkətində fasilə yaranıb.