İcbari tibbi sığorta ilə bağlı hazırlıq işləri gedir. Yəqin ki, yaxın zamanlarda bu sistemə keçid başlanılacaq.
Oxu.Az ANS PRESS-ə istinadən xəbər verir ki, bu sözləri Səhiyyə nazirinin müavini Elsevər Ağayev deyib.
O bildirib ki, əvvəl bu pilot şəklində həyata keçiriləcək. Sonradan isə icbari tibbi sığorta bütün respublikanı əhatə edəcək:
“İcbari tibbi sığorta məsələsi xarici ölkələrdə də ilk illərdə problemlərin yaranmasına səbəb olub. Elə ölkələr var ki, orada icbari tibbi sığorta tətbiqi başlayıb və sonradan yaranan problemlərdən dayanıb, daha sonra isə yenidən bərpa edilib. Ona görə də biz çalışırıq ki, ən uyğun modeli seçək”.
Nazir müavini qeyd edib ki, artıq icbari tibbi sığorta ilə bağlı model də seçilib və həmçinin qanunvericilik aktları da hazırlanıb.
