1 İyun - Uşaqların Beynəlxalq Müdafiəsi Günü münasibətilə "İçərişəhər" Dövlət Tarix-Memarlıq Qoruğu İdarəsinin təşkilatçılığı ilə baş tutan "Nağıllar aləmi İçərişəhər" festivalı paytaxtın mərkəzində yerləşən bu qədim və simvolik məkanda balacalar üçün unudulmaz bir günə çevrilib.
Festivalın məqsədi və əhəmiyyəti barədə Oxu.Az-a danışan Qoruq İdarəsinin Aparat rəhbərinin müavini Rəna Nəsirova-Mustafayeva bildirib ki, bu cür tədbirlər uşaqların həm əylənməsi, həm də milli-mədəni irslə ünsiyyət quraraq böyüməsi üçün əhəmiyyətli vasitədir:
"Biz istəyirik ki, uşaqlar İçərişəhəri təkcə tarixi abidələr kimi deyil, həm də canlı, yaradıcı, onların təxəyyülünə xitab edən bir məkan kimi tanısınlar. Bu festival məhz bu məqsədə xidmət edir".
Rəna Nəsirova-Mustafayevanın sözlərinə görə, builki festival əvvəlki illərlə müqayisədə daha geniş miqyasda və müxtəlif məkanlarda təşkil olunub:
"İçərişəhərin Qız Qalası meydanı, Arxeoloji bağ, Bakı Fotoqrafiya Evi, "Zaman" Art Qalereyası, eləcə də tanınmış mədəniyyət xadimlərinin ev muzeylərində interaktiv proqramlar, sərgilər və uşaq yönümlü təqdimatlar keçirilir".
Qoruq rəsmisi festivalın sosial yönümünə də toxunub. O qeyd edib ki, Respublika Diaqnostika Mərkəzinin təşəbbüsü ilə uşaqlar üçün həyata keçirilən pulsuz tibbi müayinələr valideynlər tərəfindən məmnunluqla qarşılanıb:
"Təkcə əyləncə yox, eyni zamanda sosial məsuliyyət hissini bölüşmək bizim üçün vacibdir. Uşaqların sağlamlığı və rifahı hər şeydən önəmlidir".
O bildirib ki, festival çərçivəsində təqdim olunan sərgilər - məktəbli rəssamların çəkdiyi nağıl mövzulu tablolar, interaktiv oyunlar, "Milli Mətbəxin Palitrası" adlı kulinariya guşəsi, şahmat turniri və teatr səhnəcikləri uşaqlara bayram ovqatı bəxş edib.
"Bu festivalla biz bir daha göstərmək istədik ki, İçərişəhər yalnız keçmişin mirası deyil, həm də uşaqların sevinci və gələcəyin ümidi ilə dolu yaşıl bir məkandır," - deyə Rəna Nəsirova-Mustafayeva bildirib.
Aləmdə Nəsib
