Heydər Əliyev Fondunun vitse-prezidenti, IDEA İctimai Birliyinin təsisçisi və rəhbəri Leyla Əliyevanın təşəbbüsü ilə həyata keçirilən "Yaşıl Marafon" kütləvi ağacəkmə kampaniyası çərçivəsində növbəti ağacəkmə aksiyası keçirilib.
Oxu.Az xəbər verir ki, Qobustan rayonunun Təklə kəndi ərazisində təşkil olunan aksiyada IDEA könüllülərinin iştirakı ilə 1 000-dən çox şam ağacı əkilib.
Kampaniya çərçivəsində keçirilən aksiyalarda hər regionun torpaq-iqlim şəraitinə uyğun ağac növlərinə üstünlük verilir. Bu məqsədlə ərik, iydə, şam, fıstıq, sərv, akasiya, ağcaqayın, göyrüş, qoz, palıd və şabalıd ağacları əkilir.
Qeyd edək ki, IDEA İctimai Birliyi və Ekologiya və Təbii Sərvətlər Nazirliyinin birgə təşkilatçılığı ilə həyata keçirilən "Ümumrespublika yaşıllaşdırma marafonu"nun ("Yaşıl Marafon") əsas məqsədi ölkədə yaşıllıq sahələrini artırmaq, ağacəkmə ənənəsini təşviq etmək, ətraf mühitin mühafizəsinə və ölkəmizin flora biomüxtəlifliyinin zənginləşdirilməsinə töhfə vermək, eləcə də yaşıllıqların qorunması ilə bağlı maarifləndirmə işlərini genişləndirməkdir.
"Yaşıl Marafon" çərçivəsində 2026-cı ilin payız və 2027-ci ilin yaz əkin mövsümlərində ölkə üzrə 2 milyondan çox ağacın əkilməsi nəzərdə tutulur.
