İki minə yaxın müəllim iş yerini dəyişib

29 aprel-6 may tarixlərində keçirilən müəllimlərin iş yerinin dəyişdirilməsi müsabiqəsinin vakansiya seçimi mərhələsinin nəticələri şəxsi səhifələrə göndərilib. Müəllimlər şəxsi səhifələrinə daxil olaraq vakansiya seçiminin nəticələri ilə tanış ola bilərlər.

Bu barədə Oxu.Az-a İnsan Resursları Mərkəzindən məlumat verilib.

Bildirilib ki, elektron yerləşdirmə zamanı 16 nəfər şəhid ailəsi üzvü olmaqla 1 868 nəfər müəllim iş yerini dəyişdirmək imkanı qazanıb:

"Növbəti mərhələdə uğur qazanan müəllimlərin sənədlərinin yoxlanılması prosesi həyata keçiriləcək.

Qeyd edək ki, uğur qazanan müəllimlərin sənədləri yoxlanıldıqdan sonra tutduqları vakansiyaya təyin olunacaqlar. Sənədlərin yoxlanılması prosesi ilə bağlı məlumat müəllimlərin şəxsi səhifələrinə göndəriləcək".