Ən son xəbərləri bizim "WhatsApp" kanalımızda izləyin
İstilik təchizatı xidməti üzrə tariflər dəyişdi
Azərbaycanda 2025-ci il yanvarın 2-dən bir sıra kommunal xidmətlər üzrə qiymətlər dəyişib.
Oxu.Az xəbər verir ki, bu barədə Tarif Şurası məlumat yayıb.
Məlumata görə, hazırda "Azəristiliktəchizat" ASC üzrə 1 m² sahə üçün istilik təchizatı xidmətinin maya dəyəri 1,10 manat təşkil edir. Lakin 2011-ci ildən bu sahə üzrə ödənişlər 1 m² sahə üçün 15 qəpikdir. Aradakı qiymət fərqi dövlət büdcəsindən ayrılan subsidiya hesabına qarşılanır. Bu sahədə yumşaq tarif siyasəti həyata keçirilməklə optimal tarifin müəyyənləşdirilməsi qərara alınıb.
Beləliklə, əhaliyə göstərilən istilik təchizatı xidmətinin tarifi bu gündən aşağıdakı kimi hesablanır:
"Azəristiliktəchizat" ASC tərəfindən əhali istehlakçı qrupuna göstərilən istilik xidmətinin tarifi sayğac quraşdırılmadığı halda aylıq 1 m2 üçün 30 qəpik səviyyəsində təsdiq edilib. Sayğac quraşdırıldıqda isə 1 Qkal üçün (təqribən 40-50 m² sahə üçün) 14,6 manat həddində müəyyənləşdirilib.
Tarif Şurasından bildirilib ki, bu tarif tənzimləməsi dövlət büdcəsindən asılılığın azalmasına, istilik təchizatının əhatəsinin genişləndirilməsinə və bu şəkildə xidmətin keyfiyyətinin yüksəldilməsinə şərait yaradacaq.