Məhərrəmliyin başa çatmasına sayılı günlər qalıb. Bu o deməkdir ki, ölkəmizdə toy mövsümü yenidən canlanmağa başlayacaq. Evlənməyə hazırlaşan cütlükləri ən çox maraqlandıran məsələlərdən biri şadlıq saraylarında qiymətlərin dəyişib-dəyişməməsi, eləcə də uyğun tarix tapmağın mümkünlüyüdür.
Bəs real durum necədir? Ayın ikinci yarısından etibarən qiymət artımı gözlənilirmi?
Oxu.Az mövcud vəziyyəti öyrənmək üçün paytaxtın müxtəlif qiymət seqmentlərini əhatə edən yüksək və orta səviyyəli şadlıq sarayları ilə əlaqə saxlayıb.
Bakı şəhərinin Nizami rayonu, Mikayıl Əliyev küçəsində yerləşən restoranların birindən Oxu.Az-ın sorğusuna cavab olaraq bildirilib ki, ötən illə müqayisədə sifarişlərdə ciddi azalma müşahidə olunur:
"Qiymətlərimiz minimum 80, maksimum 160 manatdır. Qiymətlərdə artım edilməyəcək, çünki bu, müştəri itkisinə səbəb ola bilər. Daha çox həftəsonları üçün rezervasiya edilir. Tələbat isə mövsümə görə dəyişir. Hazırda bizdə boş tarix tapmaq çətin deyil".
Həmin küçədəki digər şadlıq sarayından isə bildirilib ki, sifarişlərdə artım var:
"Sifarişlərin az və ya çox olması əsasən administratorların işindən asılıdır. Ümumən, ötən illə müqayisədə vəziyyət daha yaxşıdır, artım müşahidə edirik. Zallara uyğun müxtəlif paketlərimiz var. Minimum qiymət 70, maksimum isə 150 manatdır. Qiymətlərdə artım olmayacaq, çünki rəqabət çoxdur. Ən çox avqustun ikinci yarısı, sentyabr, oktyabr və noyabr aylarına tələbat olur. Hazırda həftəiçi boş günlərimiz var, həftəsonları isə demək olar ki, tam doludur".
Sözügedən küçədəki başqa bir restorandan sifarişlərin zəif olduğu bildirilib:
"Bizdə qiymətlər minimum 60, maksimum 100 manatdır. Ən çox sentyabr ayı üçün sifariş alırıq, digər aylarda müraciət azdır. Müştərilər əsasən şənbə gününə üstünlük verirlər. Hazırda boş yerlərimiz kifayət qədərdir".
Bakı şəhərinin Səməd Vurğun küçəsində yerləşən restorandan isə qeyd olunub ki, əvvəlki illərlə müqayisədə sifarişlər xeyli azalıb:
"Qiymətlərimiz minimum 100, maksimum 160 manatdır, dəyişiklik etməyi düşünmürük. Hazırda boş tarixlərimiz çoxdur".
Binəqədi rayonu, Süleyman Sani Axundov küçəsindəki şadlıq sarayından bildirilib ki, sifarişlərdə azalma hiss olunur:
"Toy paketlərimiz minimum 75, maksimum 130 manatdır. Ümumi iqtisadi vəziyyətdə ciddi dəyişiklik olmasa, qiymətlərimiz də dəyişməyəcək. Həftəsonlarına maraq daha çoxdur. Əsas tələbat payız aylarına olur. Hazırda boş yerlərimiz kifayət qədərdir".
Nizami rayonunun Bəkir Çobanzadə küçəsindəki orta seqment restorandan isə bildirilib ki, ötən illə müqayisədə sifarişlərin səviyyəsində ciddi dəyişiklik yoxdur:
"Sifarişlərimiz var, çox şükür. Qiymətlərimiz minimum 50, maksimum 65 manatdır. Qiymətlərin dəyişəcəyini düşünmürəm. Avqustun sonunadək və sentyabr ayının həftəsonları üçün sifarişlər daha çoxdur. Buna baxmayaraq, boş tarixlərimiz də qalır".
Bakının Sabunçu rayonu, Bakıxanov qəsəbəsi, S. Mehmandarov küçəsindəki restorandan isə böyük toylarla bağlı vəziyyətin zəif olduğu bildirilib:
"Nişan, kiçik toy və ad günü üçün sifarişlər alırıq, amma böyük toylarla bağlı müraciət yoxdur. Qiymətlərimiz 30-32 manat aralığındadır. Qiymətlərdə dəyişiklik gözləmirik. Hazırda boş yerlərimiz çoxdur".
Bakı şəhərinin Nəsimi rayonu, Əli Tağızadə küçəsindəki restorandan da sifarişlərin azaldığı qeyd olunub:
"Hazırda durğunluq müşahidə edirik. Həftədə cəmi bir-iki nəfər gəlib maraqlanır. Qiymətlərimiz minimum 50, maksimum 80 manatdır. Bu gedişatla qiymət artımı gözləmirik. İnsanların maddi vəziyyəti əvvəlki kimi deyil. Həftəsonlarına maraq çox olsa da, əvvəlki illərdə ara günlər üçün də kifayət qədər sifariş olurdu".
