Metro və avtobusdan istifadə etmədiyi halda kart balansından gediş haqqının çıxıldığını iddia edən vətəndaşla bağlı "K Group" MMC ("Bakı Kart") açıqlama verib.
Qurumdan Oxu.Az-ın sorğusuna cavab olaraq qeyd olunub ki, "Bakı Kart" tərəfindən tətbiq edilən ödəniş sistemi həm "birdəfəlik keçid imkanı", həm də "Delayed Authorization" (Gecikdirilmiş avtorizasiya) prinsiplərini əhatə edir.
"Bir dəfəlik keçid" funksiyası sayəsində kart balansı müvəqqəti kifayət etmədiyi hallarda belə sərnişin ictimai nəqliyyat vasitəsindən istifadə edə bilər. Balans bərpa olunduqda ödəniş avtomatik tutulur. Əlavə olaraq qeyd edək ki, bu funksiya ödəniş əməliyyatlarının çevik şəkildə, bir saniyənin altında aparılmasını təmin edir. Gecikdirilmiş avtorizasiya isə ödəniş əməliyyatlarının texniki səbəblərdən sonradan rəsmiləşdirilməsinə imkan verir", - qeyd edilib.
Məlumatda əlavə olunub ki, bu mexanizmlər hər hansı texniki nasazlıq və ya əsassız vəsait silinməsi ilə bağlı deyil, sistemin işləmə prinsiplərindən irəli gəlir:
"Məqsəd sərnişinlərin rahatlığını təmin etmək və ödəniş prosesinin fasiləsizliyini qorumaqdır.
Ödənişlərlə bağlı sual yarandığı halda vətəndaşlar bank kartının emitenti ilə yanaşı, "Bakı Kart"a rəsmi şəkildə müraciət edərək əməliyyatlar barədə ətraflı məlumat əldə edə bilərlər.
Əlaqə üçün qısa nömrə: *4343, şəhər nömrəsi: +994 12 404 14 21
Bakı sakini Rafael Abbasov metro və avtobusdan istifadə etmədiyi halda kart balansından gediş haqqının çıxdığını bildirir.
R.Abbasov Oxu.Az-a müraciətində qeyd edib ki, ictimai nəqliyyatdan istifadə etmədiyi halda bank kartından bir neçə dəfə 0,60 manat çıxılıb.
Müraciətdə həmçinin bildirilir ki, oxşar hal gecə saat 04:00-da da baş verib.
Şikayətçinin sözlərinə görə, dekabrın 29-da günorta və gecə saatlarında evində olub, avtobusdan, metrodan istifadə etməyib:
"Əməliyyat tarixçəmdə müxtəlif vaxtlarda "TP BUS" və "TP METRO" qeydləri ilə bir neçə dəfə 0,60 manatın çıxıldığı görünür. Kartımda həmişə pul olub, söhbət əvvəlki borcun tutulmasından da getmir. NFC texnologiyası ilə bağlı problem ola bilər. Çünki yeni tətbiq olunur. Gediş haqqının hansı əsasla çıxıldığı məlum deyil. Ümumilikdə kartımdan təxminən üç manat vəsait əsassız silinib".
Qeyd edək ki, məsələ ilə bağlı aidiyyəti qurumlara sorğu ünvanlanıb.
Məhərrəm Əliyev
