"Qeyri-adi bir haldır ki, bu yaşda uşaqlar investorlar qarşısında qrant üçün çıxış edirlər. Çıxışlarda uşaqların təqdim etdiyi layihələr əsaslandırılır və belə olan halda investorun da ən vacib vəzifə öhdəliyi odur ki, həm dəyərləndirsin, həm də öz töhfəsini versin".
Bunu Oxu.Az-a açıqlamasında "MiniBoss Business School Baku"nun direktoru Alina Xələfova deyib.
"Bu gün bu səhnədə ilk dəfə olaraq üç məzunumuz çıxış edəcək. Hər biri 17 yaşındadır. Onlardan biri artıq biznes sahibidir. Bu isə çox yaxşı bir haldır", - deyə direktor vurğulayıb.
A.Xələfova məktəbdə süni intellektdən istifadəyə də münasibət bildirib:
"Süni intellekti müsbət istiqamətlərdə istifadə edərək uşaqların biliklərinin daha da artmasına nail olmaq mümkündür. Uşaqların istəyi olmaqla və bu tədrisə mane olmursa, süni intellekt çox yaxşı vasitədir".
"Bizim əsas hədəfimiz isə daha çox ailələrə tədris metodikamız barədə məlumat verməkdir. Məktəbimiz 8 illikdir, hər ilin sonunda uşaqlar bir layihə üzərində işləyir və sertifikat və diplom əldə edirlər. Bu, məktəbdən əlavə fəaliyyət sayılır və uşaqlara biznes bilikləri verir", - müsahibimiz fikrini tamamlayıb.
