Hər millətin tarixi boyu qəhrəmanları olub. Lakin Mübariz İbrahimov kimi cəsur, ölümün gözünə dik baxan, bir an belə tərəddüd etmədən Vətən üçün canını fəda edən qəhrəmanlar bəşər tarixində nadir hallarda doğulur. Onun hekayəsi bir igidin, bir övladın, bir əsgərin, bir insanın gerçək Vətən sevgisinin təcəssümüdür.
Mübariz İbrahimov sadəcə bir ailənin övladı deyildi, bir millətin ümid dolu gələcəyi idi. Milli Qəhrəmanın anası Şamama İbrahimova oğlunun kiçik yaşlarından başqa uşaqlardan fərqləndiyini söyləyib:
"Üç oğlum var. Mübariz sonbeşiyimizdir. O, balacalıqdan bütün uşaqlardan fərqlənirdi. Məni nə uşaq vaxtı, nə də böyüyəndə incitdi. 14 yaşından boksla məşğul olurdu. Tay-tuşları toya-şənliyə gedirdi, o isə yox. Düşünürdüm ki, Mübariz heç nə bilmir. Amma yaşından çox bilirmiş, sadəcə az danışırmış".
Azərbaycan Daxili Qoşunlarının Xüsusi Təyinatlı Dəstəsində xidmətini uğurla başa vurduqdan sonra Vətən sevgisi Mübarizi yenidən orduya qaytarır.
O, 2009-cu ildə gizir kurslarını bitirib, Tərtərdə yerləşən hərbi hissəyə göndərilir. Mübariz üçün hər gün Vətənə xidmət düşmənə qarşı mübarizə demək idi. Amma bu mübarizənin ən parlaq səhifəsi yazılmamışdı.
"O, hərbi xidmətə qayıdanda atası çox pis oldu. Dedi ki, övladımız əlimizdən getdi. Mübarizə söylədi ki, müharibə başlayanda gedərsən. Amma o, atasına qulaq asmadı", - şəhid anası deyib.
Ş.İbrahimova Mübarizin şəhid olacağına inanmadığını bildirib:
"Oğlumun yazdığı məktubu oxumağa atası getmişdi. Ondan məktubdakı yazının Mübarizə aid olub-olmadığını soruşublar. Deyib ki, mənim ağlım başımda deyil, oxuyun, biləcəyəm. Məktubu oxuyanda söyləyib ki, bu Mübarizin sözləridir. O həmin yazdıqları ilə bizi olacaqlara öyrəşdirirdi".
Daha ətraflı Baku TV-nin videomaterialında:
