"Bakı-Şamaxı-Yevlax magistral avtomobil yolu, həmçinin respublika üzrə bütün yollar nəzarətdə saxlanılır".
Bunu Azərbaycan Avtomobil Yolları Dövlət Agentliyinin (AAYDA) Mətbuat Xidmətinin rəhbəri Anar Nəcəfli Oxu.Az açıqlamasında deyib.
O bildirib ki, qarlı və şaxtalı hava şəraiti ilə bağlı hər hansı problem yoxdur:
"Problem yaranan ərazilərə operativ müdaxilə olunur və hərəkətin təhlükəsizliyi-fasiləsizliyi təmin olunur. Qış fəslinə uyğun avtomobili təchiz etməyən sürücülərin dağlıq və dağətəyi ərazilərdən keçən avtomobil yollarından istifadə etməməyi tövsiyə olunur".
Ölkə ərazisində davam edən qeyri-sabit hava şəraiti avtomobillərin hərəkətində çətinliklər yaradır.
Oxu.Az xəbər verir ki, gecə saatlarından etibarən aramsız yağan qar yolların buz bağlamasına səbəb olub.
Hazırda Bakı-Şamaxı-Yevlax avtomobil yolunda, İsmayıllıda, Laçının Sus kəndi ərazisində, Lerikin Şingədulan kəndində yollar buz bağlayıb.
Həmin ərazilərdə hərəkətdə olan nəqliyyat vasitələri ciddi çətinliklərlə üzləşirlər.
Daxili İşlər Nazirliyinin Mətbuat Xidmətinin Şəki regional qrupundan Oxu.Az-a bildirilib ki, qarlı hava şəraiti ilə əlaqədar Bakı-Şamaxı avtomobil yolunda hərəkətin təhlükəsizliyinin təmin edilməsi məqsədilə polis əməkdaşları tərəfindən gücləndirilmiş rejimdə xidmət təşkil olunub. Digər aidiyyəti qurumun əməkdaşları ilə birgə yollar, nişanlar qardan və buzdan təmizlənir, qum və duz səpilir. Sürücülərin mənzil başına təhlükəsiz şəraitdə çatmaları məqsədilə bu istiqamətdə zəruri tədbirlər davam etdirilir.
Aygün Mirakif
