Özünü öldürmək istəyən Həsən Kürün son vəziyyəti ilə bağlı AÇIQLAMA - Dostu danışdı

"Hazırda orqanizm cavan olduğu üçün özü mübarizə apara bilir. Məsələn, beyindaxili hematomanı yeni tomoqrafiya etdilər, irəliləyiş var".

Bunu Oxu.Az-a açıqlamasında şair Həsən Kürün dostu, həkim Əmrah Əliyev deyib.

O bildirib ki, ümumilikdə Həsən Kürün vəziyyətini həkimlər ağır olaraq qiymətləndirirlər:

"Beyin daxilində periferik hissələrdə çox sayda hematoma ocaqları var. Tam komatoz vəziyyətdə olduğunu demək olmaz. Oyana bilməsə də, tərpənir. Birinci dərəcəli koma vəziyyətindədir. Həkimlər tam oyatmağa qoymurlar".

Ə.Əliyevin sözlərinə görə, ağır travma olduğuna görə, nə qədər müddətə ayıla biləcəyi ilə bağlı həkimlər vaxt deyə bilmirlər:

"Bu beş gün də çəkə bilər, bir ay da. Hər orqanizm fərdi olduğu üçün gedişata fərqli reaksiya verir. Hazırda ağır kəllə-beyin travması aldığı üçün süni tənəffüs aparatına qoşulub".

Tibbi Ərazi Bölmələrini İdarəetmə Birliyindən (TƏBİB) isə Oxu.Az-ın sorğusuna cavab olaraq bildirilib ki, Həsən Kürün hazırda müalicəsi cərrahi profilli reanimasiya şöbəsində davam etdirilir, vəziyyəti ağır stabildir.

Qeyd edək ki, H.Kür fevralın 22-də saat 19:10-da Sabunçu Tibb Mərkəzinə hospitalizasiya olunub. Ona qapalı kəllə-beyin travması, sol bud sümüyünün qapalı sınığı, kəllə sümüyünün sınığı diaqnozu qoyulub.

Xatırladaq ki, gənc şair Sabunçu rayonunda yerləşən "Sevinc Mall" ticarət mərkəzinin üçüncü mərtəbəsindən özünü ataraq intihara cəhd edib. İlkin məlumata görə, Həsən Kür maddi problemlərə görə özünü öldürmək istəyib.

Aləmdə Nəsib