Bakının mərkəzi prospektlərindən olan 8 Noyabr prospektində velosiped yollarının və səkilərin xüsusi işıqlandırma ilə təchiz edilməsi ictimaiyyətin diqqətini cəlb edib.
Oxu.Az xəbər verir ki, məsələ sosial şəbəkələrdə geniş müzakirə mövzusuna çevrilib və vətəndaşlar bu təşəbbüsü alqışlayıblar.
Bu layihənin hansı qurumun təşəbbüsü əsasında həyata keçirilməsi ilə yanaşı, bu cür işıqlandırmanın bütün velosiped yollarını əhatə edəcəyi, yoxsa ancaq 8 Noyabr prospekti üçün nəzərdə tutulduğu sualları da meydana çıxıb.
Cavab tapmağa çalışdıq.
Bakı Abadlıq Xidmətinin İctimaiyyətlə Əlaqələr şöbəsinin rəhbəri Lalə Əliyeva Oxu.Az-a açıqlamasında layihənin təmsil etdiyi qurum tərəfindən həyata keçirildiyini diqqətə çatdırıb.
O qeyd edib ki, bunun üçün təmsil etdiyi quruma Azərbaycan Avtomobil Yolları Dövlət Agentliyi (AAYDA) müraciət edib.
"COP tədbiri zamanı velosiped yollarının salınması ilə bağlı sifariş verilmişdi. O yolların işıqlandırılması Azərbaycan Yerüstü Nəqliyyat Agentliyinə (AYNA) verilən tapşırıq idi, çünki layihə onların idi. Layihənin icrası üçün AAYDA-ya müraciət olunmuşdu. Onlar da öz növbələrində, hansı nümunə əsasında sifariş yerinə yetirilsin deyə, Bakı Abadlıq Xidmətinə müraciət etmişdilər ki, anbarlarda nə var, işıqlandırma ilə bağlı nə təklif edə bilərik?
Bakı Abadlıq Xidməti olaraq biz də, nümunə olaraq, 8 Noyabr prospektində bir neçə belə işıq dirəyi quraşdırdıq. İndiyə qədər də o iş nümunə və təklif olaraq qalır.
Bundan sonra bu işlər davam edəcəkmi, etməyəcəkmi, bu, artıq AYNA-ya veriləcək sualdır. Çünki layihə onlarındır. Əgər bu nümunələr əsasında davam ediləcəksə, ya AAYDA-ya, ya hansısa bir şirkətə, ya da Bakı Abadlıq Xidmətinə, o nümunəni davam etdirin, deyiləcək. Amma hələlik, bizdə bu layihənin davam edib etməyəcəyi ilə bağlı hər hansı məlumat yoxdur", - deyə L.Əliyeva bildirib.
AAYDA-nın Mətbuat Xidmətinin rəhbəri Anar Nəcəfli Oxu.Az-a açıqlamasında bildirib ki, AYNA-nın sifarişi əsasında ərazidə velosiped yollarının və səkilərin salınması işləri həyata keçirilib.
"8 Noyabr prospektində biz üzərimizə düşən işi icra etmişik. İşıqlandırılma məsələsi bizim layihəmiz deyil və bizim quruma bir aidiyyəti yoxdur", - deyə A.Nəcəfli bildirib.
AYNA-dan isə Oxu.Az-ın sorğusuna cavab olaraq bildirilib ki, digər yerlərdən fərqli olaraq, 8 Noyabr prospektində salınan velosiped yolları "bufer zona"lar vasitəsilə yolun nəqliyyat vasitələri üçün nəzərdə tutulan hissəsindən ayrılıb.
"Buna görə də buradakı velosiped zolaqları ayrıca işıqlandırılıb. Oxşar layihələrdə də ehtiyac yaranarsa, bu cür yanaşma tətbiq oluna bilər.
Bakı şəhərində mikromobillik zolaqlarının əksəriyyəti yolun nəqliyyat vasitələri üçün nəzərdə tutulan hərəkət hissəsində təşkil olunub. Bu halda velosiped zolaqlarının ayrıca işıqlandırılmasına ehtiyac qalmır", - deyə açıqlamada vurğulanıb.
Əzizə İsmayılova
