"Elektron attestatların hələ də təqdim edilməməsi peşə təhsil müəssisələrinə qəbul zamanı problemlər yaradır".
Oxu.Az xəbər verir ki, bu sözləri Bizim.media-ya açıqlamasında təhsil məsələləri üzrə ekspert Ramin Nurəliyev qeyd edib.
Onun sözlərinə görə, peşə təhsil müəssisələrinə qəbul üçün elektron sistem attestatın yerləşdirilməsini tələb olunur. Ancaq elektron attestatların verilməməsi problem yaradır.
"Bu səbəbdən məktəblər və valideynlər arasında narazılıqlar yaşanır. İxtisas seçimi avqustun 10-dək davam edəcək, ancaq təəssüflər olsun ki, attestatlar hələ də "mygov"a yerləşdirilməyib", - deyə ekspert qeyd edib.
Elm və Təhsil Nazirliyinin Təhsil Sisteminin İnformasiyalaşdırılması İdarəsi iddiaları təkzib edib. İdarədən bildirilib ki, sözügedən məlumatlar tələb olunmur:
"Cari ildə məzun olan şəxslərdən attestatın nömrəsi və tarixinin təqdim edilməsi tələb olunmur. Vətəndaşlar qeyd olunan məlumatları daxil etmədən "Növbəti" düyməsinə basıb müraciət edə bilirlər".
Qeyd edək ki, iyulun 23-dən etibarən 2026/2027-ci tədris ili üzrə peşə təhsili müəssisələrinə tələbə qəbuluna başlanılıb.
İxtisas seçimi avqustun 10-dək davam edəcək. Qəbul 78 peşə təhsili müəssisəsində 149 ixtisas üzrə ümumilikdə 33 120 plan yeri üçün aparılacaq. Plan yerlərinin 24 425-i dövlət sifarişli, 8 695-i isə ödənişli əsaslarla ayrılıb.
