"Bakı şəhəri, Qaradağ rayonu ərazisində yerləşən "Qobu Park-2" yaşayış kompleksində bir müddət öncə podratçı şirkət və aidiyyəti qurum tərəfindən araşdırma aparılıb. Nəticədə binaların möhkəmliyi və təhlükəsizliyi ilə bağlı hər hansı problem qeydə alınmayıb".
Bu barədə Oxu.Az-ın sorğusuna cavab olaraq Qaçqınların və Məcburi Köçkünlərin İşləri üzrə Dövlət Komitəsinin Mətbuat Xidmətindən bildirilib.
Məlumatda qeyd olunub ki, keçirilən texniki baxış və mühəndis yoxlamaları zamanı binaların istismar göstəriciləri normativ tələblərə uyğun qiymətləndirilib və hər hansı struktur riski aşkar edilməyib:
"Hazırda kompleksin texniki durumu daimi nəzarətdə saxlanılır".
"Qobu Park-2" yaşayış kompleksində vətəndaşlar yaşadıqları mənzillərin divarlarının çatlamasından narazıdırlar.
Oxu.Az-a danışan sakinlərin sözlərinə görə, yeraltı qrunt suları binanın bünövrəsini yumşaltdığı üçün əyilmələr yaranır, bu isə mənzillərdə çatların yaranmasına səbəb olur.
Sakinlər bildirirlər ki, artıq bir neçə dəfə yeraltı qrunt sularının kanalları betonla doldurulsa da, problem köklü olaraq həll edilmir, əksinə, vaxtaşırı yenidən digər binalar üçün təhlükə yaranır. Narazılıq edən sakinlər sözügedən binalardan köçmək istədiklərini də dilə gətiriblər.
Qeyd edək ki, məsələ ilə bağlı aidiyyəti qurumlara sorğu ünvanlanıb.
Məhərrəm Əliyev
