Sənət adamları ölkəyə narkotik keçirən tanınmış aktyordan danışdılar

Heydər Əliyev Beynəlxalq Aeroportunda Azərbaycana külli miqdarda narkotik vasitənin keçirilməsinin qarşısı alınıb. Həyata keçirilmiş əməliyyat-istintaq tədbirləri nəticəsində saxlanılan cinayətkar qrupun üzvlərindən biri Neftçala rayon sakini Həsənağa Elçin oğlu Məmmədovdur. Məlumatda bildirilib ki, Həsənağa Məmmədov (Həsən Ağa) tanınmış aktyordur və bir sıra filmlərdə, layihələrdə yer alıb.

Bəs maraqlıdır ki, Həsənağa Məmmədov kino camiəsində necə tanınırdı?

Əməkdart artist İlqar Cahangir Oxu.Az-a açıqlamasında bildirib ki, 4 il öncə Həsənağa Məmmədov ilə eyni layihədə yer alıblar:

"Elə yaxından tanımasam da, yaxşı biri kimi ağlımda qalıb. Yerini bilən, hörmətli oğlan idi. O layihədən sonra əlaqəm olmayıb. Narkotik məsələsini ilk dəfədir eşidirəm, təəccübləndim".

Prodüser və rejissor Elvin Abdulla isə bu fikirləri səsləndirib:

"Sonuncu filmimdə baş rolda yer alıb, tanışlığım var. Həsənağa çox müasir, savadlı, istedadlı və böyük dost çevrəsinə malik bir insandır. Bu xəbəri oxuyanda inana bilmədim, çox üzüldüm və təəccübləndim. Amma tələsməməli, əməliyyat-istintaq tədbirlərinin sonunu gözləməliyik. İnsan inana bilmir ki, Həsənağanın belə qeyri-leqal işi olar. Ailəsinə və özünə görə narahatam. Özü də bildiyim qədərilə ayağından əməliyyat olmuşdu. İttiham təsdiqini tapsa, çox məyus olaram, gözləyək".

Məhərrəm Əliyev