İstilik mövsümünə hazırlıq çərçivəsində təxminən 966 km istilik xətti su təzyiqi altında sınaqdan keçirilib, 11 km xətt yenilənib.
Bu barədə "Azəristiliktəchizat" ASC-nin mətbuat katibi Elvin Basqallı Oxu.Az-ın sorğusuna cavab olaraq məlumat verib.
Açıqlamada bildirilib ki, qurum 2026-2027-ci illər payız-qış mövsümünə hazırlıq işlərini yekunlaşdırmaq üzrədir.
"Qazanlar, nasoslar və digər əsas avadanlıqlar təmir olunub, köhnəlmiş avadanlıqların bir hissəsi dəyişdirilib. Qazanların və istilik mübadilə aparatlarının təmizlənməsi, qaz xətlərinin və təhlükəsizlik avadanlıqlarının yoxlanılması işləri görülüb. Bu tədbirlər şəbəkənin etibarlı işləməsinə və qış aylarında fasilə riskinin azaldılmasına yönəlib.
İnfrastrukturun yenilənməsi də davam etdirilir".
"Bakı və regionlarda 549 qazanxana vasitəsilə təxminən 3 800 yaşayış binasının, həmçinin təhsil, səhiyyə və digər sosial və təsərrüfat obyektlərinin istiliklə təmin edilməsi nəzərdə tutulur".
Həmçinin qeyd olunub ki, 2026-cı il martın 1-dən oktyabrın 20-dək istilik xidmətinə görə hesablanma aparılan abonentlərin sayı 174 788 əhali, 2 576 kommersiya və 665 büdcə təşkilatı abonenti olmaqla ümumilikdə 178 029-dur. Xidmət göstərilən obyektlər sırasında 449 təhsil müəssisəsi və 152 səhiyyə obyekti var.
Nəzrin Mirzəyeva
