Süni intellekt gələcəkdə məhkəmə sisteminin təkmilləşdirilməsində əhəmiyyətli rol oynayacaq

"Məhkəmə-Hüquq Şurası ölkədə hüquqi islahatların əsas dayaqlarından birinə çevrilib. Məhkəmə sistemində həyata keçirilən yeniliklər - "Elektron məhkəmə" sistemi, ixtisaslaşmış məhkəmələrin yaradılması və hakimlərin şəffaf seçimi kimi tədbirlər ədalət mühakiməsinin keyfiyyətinə müsbət təsir edib".

Oxu.Az xəbər verir ki, bunu iyunun 18-də Bakıda keçirilən Azərbaycan Respublikası Məhkəmə-Hüquq Şurasının fəaliyyətinin 20 illiyinə həsr olunmuş "Məhkəmə idarəçiliyi sahəsində qlobal çağırışlar" adlı beynəlxalq konfransda çıxış edən Ali Məhkəmənin sədri İnam Kərimov deyib.

O, rəqəmsallaşma və süni intellektin gələcəkdə məhkəmə sisteminin təkmilləşdirilməsində əhəmiyyətli rol oynayacağını da qeyd edib.

İ.Kərimov işğaldan azad edilən ərazilərdə məhkəmə infrastrukturunun bərpasını Azərbaycanın suveren hüquqlarının təzahürü kimi qiymətləndirib.

Sonda Ali Məhkəmə sədri dövlət başçısına göstərdiyi dəstəyə görə təşəkkür edib və Məhkəmə-Hüquq Şurasının gələcək fəaliyyətində uğurlar arzulayıb.

Elçin Aslangil