Suraxanı rayonunun Zığ qəsəbəsinin sakinləri içməli su problemi ilə üzləşiblər.
Bu barədə Oxu.Az-a İdris Süleymanov küçəsində yaşayan qəsəbə sakini məlumat verib.
O bildirib ki, əvvəl yaşadıqları binanın su anbarı olduğu üçün su ilə bağlı hər hansı problem yaşamayıblar:
"Sonradan su idarəsinin işıq idarəsinə borcu olduğu məlum oldu. Nəticədə işıq idarəsi su vurmaq üçün istifadə olunan mühərrikə verilən işığı kəsib. O vaxtdan bizə su saatla verilir. Bina evində olduğumuz üçün yay gələndə vəziyyətimiz lap çıxılmaz olur. 30 ailə sudan əziyyət çəkirik. Əgər hansısa ödəniş lazımdırsa, onu da etməyə hazırıq, təki normal su verilsin",- deyə sakin bildirib.
Məsələ ilə bağlı Oxu.Az-ın sorğusunu cavablandıran İri Şəhərlərin İçməli Su Təchizatı Xidmətindən bildirilib ki, qeyd olunan ünvandakı yaşayış binası hazırda Suraxanı Rayon Mənzil Kommunal Təsərrüfat Birliyinin nəzdindədir.
"Həmçinin hazırda binanın su təchizatı İri Şəhərlərin Birləşmiş Su Təchizatı Xidməti tərəfindən həyata keçirilmir, yəni ünvan Xidmətin balansına daxil edilməyib. Binanın su təchizatının Xidmətin balansına verilməsi ilə əlaqədar rəsmi müraciət ünvanlanıb. Müraciətə cavab olaraq bildirilib ki, müvafiq sənədlər təqdim edilməli və müvafiq prosedurlar icra edilməlidir. Hazırda işin müəyyən hissəsi icra edilib, digər bütün hüquqi proseslər də tamamlandıqdan sonra bina Xidmətin balansına keçəcək və su təchizatı qurum tərəfindən həyata keçiriləcək", - deyə məlumatda bildirilir.
Əzizə İsmayılova
