Bakının Nərimanov rayonunun Təbriz küçəsi 100A ünvanında yerləşən dördmərtəbəli binanın girişində sakinlərdən birinin icazəsiz şəkildə quraşdırdığı konstruksiya narazılığa səbəb olub.
Baku TV-nin məlumatına görə, bina sakinləri həmin şəxsin qonşulara məlumat vermədən blokun giriş hissəsində dolab tipli bir qurğu hazırladığını deyib.
Binadakı mənzil sahiblərindən biri deyib ki, qonşuların etirazından sonra tikinti işləri dayandırılsa da, konstruksiya bir neçə gündür olduğu kimi qalıb:
"Bir həftə idi orada iş gedirdi. Dedilər sökəcəyik, amma hələ də yerindədir".
Başqa bir sakin isə bu addımı müsbət qiymətləndirib. Onun fikrincə, həmin yerin nəzarətsiz qalması müxtəlif xoşagəlməz hallara yol açırdı:
"Biri girib pivə içirdi, biri nəşə çəkirdi. Əgər nəzarətdə olacaqsa, bu yaxşı addımdır".
Məsələ ilə bağlı ərazi üzrə 114 saylı Mənzil-Kommunal İstismar Sahəsindən bildirilib ki, Baku TV-nin çəkilişindən sonra əməkdaşlar tərəfindən sözügedən konstruksiya sökülüb və ərazi təmizlənib.
