Bu ilin ilk rübündə xaricdə təhsil almış 10 nəfərin diplomunun saxta olduğu aşkarlanıb.
Oxu.Az xəbər verir ki, bu barədə Təhsildə Keyfiyyət Təminatı Agentliyi (TKTA) məlumat yayıb.
Bildirilib ki, 2026-cı ilin I rübündə TKTA-ya xarici kvalifikasiyaların tanınması ilə bağlı 1 305 müraciət daxil olub.
Qeyd edilib ki, müraciətçilərin 1 050-si barədə müsbət qərar verilərək onlara müvafiq şəhadətnamələr təqdim edilib, 255 nəfərin müraciəti isə mənfi qərarla yekunlaşıb.
Ölkələr üzrə müraciətlərə baxdıqda ən çox Türkiyə, Rusiya və Ukraynadan olub. Belə ki, Türkiyə Respublikasından 445, Rusiya Federasiyasından 356, Ukraynadan 203 müraciət qeydə alınıb.
Ən çox müraciət olunan ixtisaslara gəlincə, hüquqşünaslıq üzrə 135, iqtisadiyyat üzrə 78, maliyyə üzrə 69, tibb üzrə 67, biznesin idarə edilməsi üzrə 63 müraciət qeydə alınıb.
