Qətlə görə 11 il həbs cəzası verilmiş şəxs bəraət aldı: Təzminat istəyəcək - YENİLƏNİB + FOTO/VİDEO

Təqsirsiz olduğu üç il on ay sonra sübuta yetirilən Polad İsmayılov təzminat almaq üçün iddia qaldıracaq.

Bununla bağlı Oxu.Az-a onun vəkili Zabil Qəhrəmanov məlumat verib. O qeyd edib ki, zərərçəkmiş Polad İsmayılov qanunvericiliklə müəyyən edilmiş təzminat hüququndan istifadə edəcək:

“Adətən, bu cür işlərdə təzminat haqqında iddia tələbi zərərçəkmişə dəymiş ziyanın hesablanması həbsdə qaldığı günlərin sayı və s. nəzərə alınmaqla hazırlanır. Polad İsmayılov bu gün bəraət alıb. Sevincimizi yaşayaq, daha sonra təzminat üçün iddia tələbi qaldıracağıq”.

Xatırladaq ki, Cinayət-Prosessual Məcəlləsinin 55-56-cı maddələrinə əsasən, bəraət almış şəxsin maddi və mənəvi ziyana görə təzminat tələb etmək hüququ var.

Qətlə görə 11 il həbs cəzası verilmiş şəxs bəraət aldı: Təzminat istəyəcək - YENİLƏNİB + FOTO/VİDEO

12:18

İki il əvvəl kirayə qaldığı evin sahibini öldürməkdə təqsirli bilinərək 11 il azadlıqdan məhrum edilmiş Polad İsmayılova bəraət verilib.

“Qafqazinfo”nun əldə etdiyi məlumata görə, bu barədə Şəki Apellyasiya Məhkəməsi qərar qəbul edib.

Rövşən Rəfiyevin sədrlik etdiyi hakimlər heyəti müttəhimin cinayəti törətməsinə əsas verən yetərli sübutlar olmadığı qənaətinə gəlib.

Həmçinin müdafiə tərəfinin, vəkil Zabil Qəhrəmanovun ortaya qoyduğu sübutlar məhkəmə üçün yetərli olub. Məsələn, zərərçəkmiş Seyran Əyyubova öldürülən vaxt hadisə yerindən başqa şəxsə məxsus 3-cü qrup qan nümunəsi tapılıb. Vəkilin sözlərinə görə, ekspert isə ovaxtkı rəyində göstərib ki, Polad İsmayılovun qanı ilə həmin qan eyni şəxsə məxsusdur. Əsas ziddiyyət də bundadır. Çünki P.İsmayılovun qanı 1-ci qrupdur.

Qərara əsasən 50 yaşlı P.İsmayılova bəraət verilib. O, 3 il 10 ay sonra məhkəmə zalından dərhal azadlığa buraxılıb.

Xatırladaq ki, Zaqatala rayon sakini, 61 yaşlı Seyran Şakir qızı Əyyubova 2011-ci ilin fevralında yaşadığı evdə öldürülüb. Faktla bağlı başlanan cinayət işinin üstü 9 il sonra açılıb. İttihama görə, mərhum S.Əyyubovanı yaşadığı evdə günlük kirayədə qalan Polad Şəmsəddin oğlu İsmayılov şəxsi münasibətlər zəminində aralarında yaranmış münaqişə zamanı bıçaqla qətlə yetirib.

İsmayılova qarşı Cinayət Məcəlləsinin 120.1 (qəsdən adam öldürmə) maddəsi ilə ittiham verilib, Şəki Ağır Cinayətlər Məhkəməsinin hökmü ilə 11 il müddətinə azadlıqdan məhrum edilib. Şəki Apellyasiya Məhkəməsi hökmü qüvvədə saxlayıb.

Aysel Aslan