Azərbaycanın aparıcı pərakəndə satış şəbəkələrindən biri olan "Bravo", müştəri yönümlü innovativ yanaşmalarını genişləndirərək 2025-ci ili uğurla başa vurur. Şirkət il ərzində rəqəmsal texnologiyalar, fiziki mağaza şəbəkəsinin inkişafı, məhsul keyfiyyətinin yüksəldilməsi və sosial məsuliyyət layihələri istiqamətində mühüm addımlar atıb.
2025-ci ildə "Bravo" mobil tətbiqi ekosistemi çərçivəsində təqdim olunan "Bravo online" alış-veriş platforması müştərilərə mağazaya gəlmədən geniş məhsul seçimi və sərfəli qiymətlərlə alış-veriş imkanı yaradıb. Loyallıq proqramı və onlayn alış-veriş funksiyalarını bir platformada birləşdirən mobil tətbiq müştərilərə daha rahat, sürətli və fərdiləşdirilmiş alış-veriş təcrübəsi təqdim edir.
"Bravo" 2025-ci ildə strateji inkişaf planına uyğun olaraq ölkə üzrə 12 yeni mağaza açaraq şəbəkəsini 145 mağazaya çatdırıb. Yeni açılan mağazalar arasında "Sea Breeze Premium Bravo" mağazası, eləcə də Sumqayıt şəhərində və Bakının Səttar Bəhlulzadə, İsmayıl Hidayətzadə, Qədir Məmmədov, Afiyəddin Cəlilov kimi əsas küçələrində fəaliyyətə başlayan mağazalar yer alır. Bu addımlar "Bravo"nun müştərilərə daha yaxın olmasına və əlçatanlığın artırılmasına xidmət edir.
Müştəri rahatlığını artırmaq məqsədilə 60-dan çox mövcud "Bravo" mağazası yenilənərək müasir dizayn və funksional planlama ilə istifadəyə verilib. Yenilənmiş mağazalar rahat alış-veriş mühiti və müasir interyeri ilə seçilir.
BRAVO məhsul keyfiyyətini əsas prioritetlərindən biri kimi qorumaqda davam edir. "Tarladan BRAVO-ya" konsepti çərçivəsində meyvə və tərəvəzlər birbaşa etibarlı fermerlərdən tədarük olunaraq "Bravo bazar"da yüksək keyfiyyət və maksimum təravət prinsipləri əsasında satışa çıxarılır. Məhsulların seçimi, daşınması və saxlanması mərhələlərində ciddi keyfiyyət nəzarəti tətbiq olunur ki, bu da həm istehlakçı məmnuniyyətinə, həm də yerli kənd təsərrüfatının inkişafına töhfə verir.
Ət və ət məhsulları sahəsində "Bravo" tam halal kəsim standartlarına uyğun fəaliyyət göstərir. Məhsullar soyuq zəncir qorunmaqla birbaşa istehsal məntəqələrindən mağazalara çatdırılır. Süd və süd məhsulları isə sertifikatlı istehsalçılardan tədarük olunur və temperatur rejiminə ciddi nəzarət edilir.
2025-ci ildə "Bravo" öz brend məhsul portfelini 200-ə yaxın yeni çeşidlə genişləndirib. "Femilea", "Oluna", "Sunbaı", "Bravo Fırın", "Masado", "Ulusu", "Coolsy", "Cleverest" və "Papı Soft" kimi məhsullar keyfiyyət və əlçatan qiymət prinsipləri ilə müştərilərin rəğbətini qazanıb.
İl ərzində keçirilən kampaniyalar və lotereyalar yüzlərlə ailənin sevincinə səbəb olub. 2025-ci ildə iki dəfə təşkil olunan "Super 5" və digər lotereyalar sayəsində bir mənzil, altı avtomobil və yüzlərlə müxtəlif hədiyyə "Bravo" müştərilərinə təqdim edilib.
"Bravo" sosial məsuliyyət layihələrini də davamlı şəkildə həyata keçirir. "Vətən Əmanətlərinin keşiyindədir!" layihəsi çərçivəsində şəhid ailələrinin övladlarına bayram günlərində sovqatlar aparılır.
Həmçinin ASAN könüllülərlə birgə "Bir qəlbi də sən isit" və "Bilik karvanı" layihələri çərçivəsində aztəminatlı ailələrin uşaqlarına müxtəlif hədiyyələr, ehtiyac məhsulları və təhsilyönümlü dəstək göstərilir. Bu təşəbbüslər cəmiyyətdə sosial həmrəyliyin gücləndirilməsinə xidmət edir.
Ətraf mühitin qorunması "Bravo"nun prioritet istiqamətlərindən biri olaraq qalır. Ekologiya və Təbii Sərvətlər Nazirliyi ilə birgə icra olunan "Plastikləri tingə dəyiş" layihəsi nəticəsində yüzlərlə ağac əkilib.
Hipermarketlərin qarşısında quraşdırılan xüsusi qutular vasitəsilə 500 kiloqramdan çox plastik tullantı toplanaraq təbiətə zərər vermədən emala yönləndirilib. Eyni zamanda, utilizasiyası çətin olan istifadə olunmuş batareyaların toplanmasına dəstək göstərilir.
2025-ci il "Bravo" üçün yalnız inkişaf ili deyil, eyni zamanda müştərilərə, cəmiyyətə və ətraf mühitə dəyər qatılan bir il kimi yadda qalıb. Şirkət innovasiya, müştəri məmnuniyyəti, sosial və ekoloji məsuliyyət prinsiplərinə əsaslanaraq gələcək illərdə də fəaliyyətini bu istiqamətdə davam etdirməyi hədəfləyir.
