"SAVALAN - ASPI Winery" şərab zavodunun dəstəyi ilə "Art Zone" Rəngkarlıq Simpoziumu keçirilib

9-14 sentyabr 2024-cü il tarixlərində Qəbələdə "SAVALAN - ASPI Winery" şərab zavodunun dəstəyi ilə növbəti dəfə ölkəmizin məşhur rəssamlarını öz sıralarında birləşdirən ənənəvi "Art Zone" Rəngkarlıq Simpoziumu keçirilib.

Artıq 9-cu dəfə baş tutan simpoziumda əsərləri dünyanın bir çox ölkələrinin muzey və qalereyalarında sərgilənən, eləcə də şəxsi kolleksiyaları bəzəyən Azərbaycanın Xalq və Əməkdar rəssamları Elyar Əlimirzoyev, Müseyib Əmirov, Yelena Haqverediyeva, Vüqar Muradov, rəssamlar Elnur Babayev, İlqar Tahiri, Aydın Əsgərov eləcə də gənc, lakin rəngkarlıq sənətində öz dəsti-xəttilə seçilən Bəhruz Kəngərli, Reyhan Aslanova, Cavid İlham iştirak ediblər. Onlarla yanaşı builki tədbirə Rusiyada yaşayan tanınmış Azərbaycan rəssamı Bayram Salamov, həmçinin də Türkiyənin "Çanaqqala 18 Mart" Universitetinin Gözəl sənətlər bölümünün müəllimi, həmyerlimiz Vahid Novruzov da qatılıblar.

Bir həftə ərzində gözəl yaradıcılıq ab-havasında keçən simpoziumda rəssamlar turizm potensialına görə öndə gedən Qəbələnin gəzməli və görməli yerlərilə, o cümlədən "SAVALAN - ASPI Winery" şərab zavodunun istehsal prosesi, üzüm bağları ilə yaxından tanış olublar. Ustad sənətçilər Qədim Qafqaz Albaniyasının tarixi məkanlarının füsunkarlığından, təbiətin ecazkarlığından bəhrənələrək bu müddət ərzində otuza yaxın əsl sənət nümunələri ərsəyə gətiriblər.

Simpoziumun keçirilməsində başlıca məqsəd ustad sənətçilərin əməyinin bəhrəsi olan bu incəsənət nümunələri vasitəsi ilə zəngin tarixi mədəniyyətimizi, eləcə də Azərbaycanın gözəl təbiətini təbliğ edərək turizm potensialını artırmaq, eləcə də şərabla incəsənətin vəhdətini bir daha tərənnüm edərək rəngkarlıq sənətinin inkişafına qatqı vermək idi.

Sonda simpoziumun iştirakçısı olan rəssamlar sertifikat və diplomlarla təltif ediliblər.