ABŞ rəsmiləri bir neçə gün əvvəl ölkənin hava nəqliyyatı sistemində baş vermiş genişmiqyaslı nasazlığa səbəb olan marşrutlaşdırıcını (router) müəyyən ediblər. Cihaz təhlil üçün mütəxəssislərə təhvil verilib.
Oxu.Az TASS-a istinadən xəbər verir ki, bu barədə ABŞ-nin nəqliyyat naziri Şon Daffi açıqlama verib.
"Problem yaradan və şəbəkəmizə məlumat ötürən marşrutlaşdırıcını aşkar etdik. Hazırda qurğu Floridadakı "L3 Harris" laboratoriyasındadır. Federal Aviasiya Administrasiyasının (FAA) nümayəndələri də oradadırlar. Araşdırmaya Federal Təhqiqat Bürosu da dəstək verir", - deyə nazir bildirib.
Şon Daffi əlavə edib ki, araşdırma zamanı problemin marşrutlaşdırıcının quraşdırılması prosesində yol verilmiş səhvdən, yoxsa cihazın özündəki texniki nasazlıqdan qaynaqlandığı müəyyən ediləcək.
Qeyd edək ki, noyabrın 13-də ABŞ Federal Aviasiya Administrasiyası (FAA) hava hərəkətinin idarə edilməsi mərkəzlərində yaranmış rabitə nasazlığı səbəbindən ölkə daxilində bütün uçuşları dörd saatdan çox müddətə dayandırmışdı. Cümə və şənbə günləri 10 mindən çox reysin ləğvinə səbəb olan bu hadisə ölkə üzrə son 25 ilin ən uzunmüddətli uçuş məhdudiyyəti kimi qeydə alınıb.
ABŞ-nin nəqliyyat naziri Şon Daffi baş vermiş fasiləni hava hərəkətinə nəzarət sistemlərinin köhnəlməsi və həddindən artıq yüklənməyə tab gətirməməsi ilə əlaqələndirib.
