ABŞ-nin İllinoys və İndiana ştatlarında baş verən şiddətli tufan və tornadolar səbəbindən 600 mindən çox sakin işıqsız qalıb.
Oxu.Az xəbər verir ki, bu barədə AP agentliyi məlumat yayıb.
Bildirilib ki, çərşənbə axşamı bölgəyə güclü fırtınalar zərbə vurub. Çikaqo şəhəri və onun ətraf ərazilərində iki tornado qeydə alınıb, yollar su altında qalıb, yaşayış evlərinə ziyan dəyib. İndiana ştatının Qeri şəhərində isə küləyin sürəti saatda 159 kilometrə çatıb. Ohayo ştatında həbsxana kompleksinə ildırım düşməsi nəticəsində 16 məhkum xəstəxanaya yerləşdirilib, onlardan biri tibb müəssisəsinə helikopterlə aparılıb. Həmçinin regionda bir nəfərin həyatını itirdiyi bildirilir: su basmış yollar xilasedicilərin zərərçəkənə vaxtında çatmasına mane olub.
ABŞ Milli Meteorologiya Xidmətinin ilkin rəyinə əsasən, bu fırtına sistemi "dereço" - uzunmüddətli və dağıdıcı düzxətli küləklərlə müşayiət olunan irimiqyaslı hava hadisəsi kimi təsnif edilə bilər.
