ABŞ-nin Kaliforniya ştatında sıx hərəkətin olduğu magistral yollardan birində nəqliyyatın hərəkəti gözlənilməz və gülməli hadisə səbəbindən iflic olub. Yüzlərlə pendir topları paketi pikapdan yola səpələnərək magistralı "pendir tarlası"na çevirib.
Bu barədə Oxu.Az xarici KİV-ə istinadən xəbər verir.
Kaliforniya Yol Patrul Xidmətinin məlumatına görə, hadisə axşam saatlarında, pik vaxtda Linvud şəhəri ərazisində baş verib.
Yolun hərəkət hissəsinə içərisində "Utz" brendinin pendir topları olan təxminən 120 konteyner aşıb. Minlərlə kiçik pendir topu və plastik qabların qırıntıları qərb istiqamətində hərəkət zolaqlarına səpələnərək sürücülər üçün ciddi narahatlıq yaradıb.
Polis nümayəndələrinin sözlərinə görə, magistralda yaranan böyük tıxacın səbəbi təkcə yola səpələnən məhsullar olmayıb. Yoldan keçən onlarla sürücü avtomobillərini hərəkət zolağında saxlayaraq, tökülən pendir paketlərini toplamaq üçün yola çıxıb.
Pulsuz ərzaq götürməyə çalışan sürücülər onsuz da sıx olan nəqliyyatın hərəkətini daha da ləngidiblər və magistralda uzunmüddətli tıxac yaranıb.
Yol polisi və xüsusi xidmətlərin müdaxiləsindən sonra hərəkət zolaqları təmizlənib və nəqliyyatın hərəkəti bərpa olunub.
