ABŞ enerji şirkətlərinə öz nüvə tullantılarından müasir reaktorlar üçün yanacaq kimi istifadə etmək imkanı təklif edib.
Oxu.Az xəbər verir ki, bu barədə Britaniyanın "Financial Times" nəşri məlumat yayıb.
Nəşrin əldə etdiyi sənədlər göstərir ki, ABŞ Energetika Nazirliyi şirkətlərə Soyuq Müharibə dövründən qalan nüvə başlıqlarından 19 tona qədər emal olunmuş plutoniumdan istifadə etməyə icazə verəcək.
Məlumata görə, ən azı iki şirkət - "Oklo" (ABŞ) və "Newcleo" (Fransa) Amerika nüvə tullantılarını almaq üçün təkliflər təqdim etmək niyyətindədir.
Qəzet qeyd edir ki, Energetika Nazirliyinin qərarı ABŞ Prezidenti Donald Tramp Administrasiyasının nüvə enerjisini stimullaşdırmaq üçün atdığı son addımlardan biridir.
Elektrik enerjisinə tələbatın sürətlə artdığı, növbəti on il ərzində isə iki dəfə də çoxalacağı vurğulanır. Bu, süni intellektin inkişafı üçün istifadə edilən məlumat mərkəzlərinin sayının artması ilə bağlıdır.
