Amerikalı 81 yaşlı strimer Syu Jako (sosial şəbəkələrdə "GrammaCrackers" adıyla tanınır) canlı yayım zamanı polis tərəfindən saxlanılıb.
Oxu.Az xəbər verir ki, bu barədə "Dexerto" məlumat yayıb.
Qeyd olunub ki, tamaşaçılar onun yayım apardığı otağa silahlı polislərin daxil olduğunu görüblər. Strimer isə həmin anda yatıbmış.
Növbəti gün "GrammaCrackers" yenidən yayım açaraq baş verənləri zarafatla danışıb. Onun sözlərinə görə, polis evə yalan çağırış səbəbindən gəlib. Naməlum şəxs hüquq-mühafizə orqanlarına təqaüdçünün güllələndiyini bildirib.
Jako qeyd edib ki, evinin qarşısına təxminən 20 polis maşını, beş xüsusi təyinatlı əməkdaş gəlib, bina üzərində isə dronlar uçub.
"Məni çölə çıxardılar. Nə baş verdiyini anlamırdım, amma bir az da əyləncəli idi. Nəvəm və uşağım məni qucaqlayırdı - adətən bu qədər diqqət görmürəm. Hətta bundan həzz alırdım", - deyə o bildirib.
Jakonun nəvəsi bildirib ki, polis əməkdaşları yayım avadanlığı ilə ehtiyatla davranıblar və kameraya düşməməyə çalışıblar.
"GrammaCrackers" "Minecraft" oyununa həsr olunan yayımlarla məşhurlaşıb. O, 2025-ci ildə nəvəsinin sarkoma müalicəsi üçün vəsait toplamaq məqsədilə "YouTube" kanalı açıb və 59 min dollar ianə yığa bilib. Hazırda nəvəsinin xəstəliyinin remissiya mərhələsində olduğu bildirilir.
