ABŞ Prezidenti Donald Trampın Administrasiyası Arlinqton milli qəbiristanlığının yaxınlığında zəfər tağının inşası üçün Konqresin razılığını almağı planlaşdırmır.
Oxu.Az xəbər verir ki, bu barədə "The Washington Post" nəşri məlumat yayıb. Ağ Evdə hesab edirlər ki, layihənin icrası üçün təxminən yüz il əvvəl başqa bir memarlıq ideyası çərçivəsində verilən, lakin heç vaxt həyata keçirilməyən səlahiyyətlər kifayətdir. Nəşrin məlumatına görə, tağın Vaşinqton ərazisindəki Kolumbiya süni adasında, "Memorial Circle" ərazisində ucaldılması nəzərdə tutulur. Ötən həftə ərazidə geodeziya və mühəndislik işlərinə başlanılıb. Bununla yanaşı, administrasiya federal memarlıq və tikinti komissiyalarından müvafiq icazələr almağa çalışır. Federal qanunvericiliyə əsasən, Milli Parklar Xidmətinin tabeliyindəki torpaqlarda abidələrin ucaldılması üçün Konqresin xüsusi qərarı tələb olunur. Ağ Ev rəsmiləri belə bir icazə üçün müraciət edib-etməyəcəkləri barədə suallardan yayınırlar. Qəzetin mənbələri isə belə bir planın olmadığını iddia edirlər. Məmurlar Arlinqton memorial körpüsünün layihələndirilməsi ilə məşğul olan 1924-cü il komissiyasının hesabatına istinad edirlər. Həmin sənəd Kolumbiya adasında 166 fut hündürlüyündə iki sütunun quraşdırılmasını nəzərdə tuturdu. Konqres layihəni 1925-ci ildə təsdiqləsə də, sütunlar heç vaxt tikilməyib. Tramp administrasiyasında iddia edirlər ki, yeni tağ həmin konsepsiyanın davamı olacaq.
Ədliyyə Nazirliyi məhkəmə sənədində bildirib ki, Konqres demək olar ki, bir əsr əvvəl komissiyanın hesabatını rəsmiləşdirməklə tağ layihəsini faktiki olaraq təsdiqləyib. Daxili işlər naziri Duq Berqam da indiki təşəbbüsün ilkin ideyaya "əsaslandığını" israr edir: sütunlar 166 fut hündürlüyünü qoruyacaq, tağın ümumi 250 fut (təxminən 76 metr) hündürlüyü isə postament və heykəllər hesabına əldə ediləcək.
Layihəni dayandırmağa çalışan hüquqşünaslar, eləcə də Konqresdəki demokratlar isə qanunun bu cür yozulmasını əsassız adlandırırlar. Vəkillərin sözlərinə görə, 1920-ci illərin səlahiyyətləri yalnız körpünün inşasına aid idi və tağ layihəsinə şamil edilə bilməz.
