ABŞ-də Kubanın keçmiş lideri Raul Kastroya qarşı irəli sürülən ittihamlar 1996-cı ildə ABŞ-yə məxsus iki təyyarənin vurulması hadisəsi ilə bağlıdır. Bu ittihamlar ölüm cəzası və ya ömürlük həbsi nəzərdə tutur.
Oxu.Az xəbər verir ki, bu barədə ABŞ Ədliyyə Nazirliyinin rəsmi press-relizində bildirilib.
Sənəddə qeyd olunur ki, təqsirli bilinəcəkləri təqdirdə ittiham olunan şəxsləri "ABŞ vətəndaşlarının qətlə yetirilməsi və qəsdən adam öldürməyə cəhd" maddələri üzrə ən ağır cəza - ölüm hökmü və ya ömürlük həbs gözləyir.
Nazirliyin açıqlamasında bir daha vurğulanır ki, sözügedən məhkəmə işi məhz 1996-cı ildə baş vermiş və iki ABŞ təyyarəsinin vurulması ilə nəticələnmiş insidentlə birbaşa bağlıdır.
ABŞ Kubanın keçmiş rəhbəri Raul Kastroya qarşı rəsmi ittiham irəli sürüb.
Oxu.Az xəbər verir ki, bu barədə "Reuters" agentliyi ABŞ Prezidenti Donald Tramp Administrasiyasının yüksəkrütbəli nümayəndəsinə istinadən məlumat yayıb.
Agentlik iddia edir ki, cinayət işinin detalları, o cümlədən ittihamların mahiyyəti açıqlanmır. Bununla belə, "Reuters" yazıb ki, ittihamlar 1996-cı ildə baş vermiş hadisələrlə bağlı ola bilər. Həmin vaxt Kuba qırıcıları ABŞ-nin Kuba mühacirlərinə məxsus iki təyyarəsini vurmuşdu.
94 yaşlı Raul Kastro Kuba inqilabçısı və 1959-2008-ci illərdə ölkəyə rəhbərlik etmiş Fidel Kastronun qardaşıdır. Raul Kastro 2008-2018-ci illərdə Kuba prezidenti və müdafiə naziri olub. O, vəzifədən getsə də, hələ də Kuba siyasətində təsirli fiqur sayılır.
"The New York Times"ın məlumatına görə, ABŞ rəsmiləri ona qarşı cinayət təqibi və hətta mümkün "oğurlanma" variantını da nəzərdən keçirir. Bu, Venesuelanın keçmiş prezidenti Nikolas Maduronun işinə bənzər ssenari kimi qiymətləndirilir.
