ABŞ hökuməti 1969-1987-ci illər arasında Nepaldan qanunsuz çıxarılmış iki nadir artefaktı ölkənin Arxeologiya Departamentinə təhvil verib.
Oxu.Az xəbər verir ki, bu barədə "The Himalayan Times" qəzeti məlumat verib.
Söhbət XIII əsrə aid edilən və buddizm mifologiyasında Avalokiteşvaranın əsas təcəssümü olan Padmapaninin qızıl suyuna çəkilmiş tunc heykəlindən, eləcə də XVI əsrə məxsus rəqs ilahəsi Nrityadevinin polixrom taxta heykəlindən gedir.
Məlumata görə, artefaktların təhvil verilməsi mərasimi ABŞ və Nepal arasında mədəni dəyərlər haqqında sazişin qüvvəyə minməsi çərçivəsində baş tutub. Sözügedən sənəd Nepalın mədəni irsinin mühafizəsi, qədim əşyaların qanunsuz ticarətinin qarşısının alınması və müvafiq araşdırmaların aparılması sahəsində ikitərəfli əməkdaşlığın inkişafını təmin edir.
Hər iki artefakt ABŞ-nin Daxili Təhlükəsizlik Xidmətinin İstintaq Xidməti, Manhetten prokurorluğunun Qədim əşyaların qeyri-qanuni dövriyyəsi ilə mübarizə bölməsi və digər tərəfdaş qurumların birgə həyata keçirdiyi istintaq tədbirləri sayəsində aşkar edilib.
Bildirilir ki, son illərdə ABŞ tərəfindən Nepala ümumilikdə 127 oğurlanmış mədəni irs nümunəsi qaytarılıb.
