"ABŞ Ukraynaya NATO-nun üzvü olaraq alacağı təhlükəsizlik zəmanətlərinə bənzər zəmanətlər təklif edir. Bu təklif Tramp administrasiyasının Ukrayna üçün irəli sürdüyü ən güclü və ən açıq təhlükəsizlik vədidir, lakin bu, örtülü ultimatum ilə gəlir: İndi qəbul edin, yoxsa növbəti versiya bu qədər səxavətli olmayacaq".
Oxu.Az xəbər verir ki, bu fikirlər "Politico"da dərc olunmuş məqalədə yer alır.
NATO Nizamnaməsinin 5-ci maddəsinin müddəalarına uyğun zəmanətlər təklifi xüsusi nümayəndə Stiv Uitkoff, Trampın kürəkəni və müşaviri Cared Kuşner, Ukrayna və Avropa rəsmiləri arasında Berlindəki danışıqlar zamanı ortaya çıxıb.
Nəşr bu fikirdədir ki, Vaşinqton Kiyevə müharibəni sonlandıracaq şərtləri qəbul etməsi üçün təzyiq göstərir.
"Ukrayna Prezidenti Volodimir Zelenski və bir çox Avropa liderləri açıq ABŞ təhlükəsizlik zəmanəti olmadan sazişə nail olmağa tərəddüd ediblər, qorxurlar ki, Rusiya müəyyən müddət keçdikdən sonra yenidən hücum edəcək.
Bu son ABŞ təklifi həmin narahatlıqları azaltmaq, həm də Zelenskini tez hərəkət etməyə təşviq etmək cəhdi kimi görünür", - məqalədə qeyd olunur.
Həmçinin yüksəkvəzifəli ABŞ rəsmisindən belə bir sitat gətirilir:
"Bu razılaşmanın əsası çox güclü zəmanətlər, 5-ci Maddə tipli zəmanətlər verməkdir. Bu zəmanətlər həmişəlik masada olmayacaq. Onlar yaxşı nəticə əldə edildiyi təqdirdə indi masadadır".
