ABŞ və İran arasında nüvə proqramı ilə bağlı vəziyyətin tənzimlənməsi üzrə növbəti danışıqlar raundu bu şənbə İtaliyada baş tutacaq.
Oxu.Az-ın TASS-a istinadən məlumatına görə, bu barədə Niderland xarici işlər naziri Kaspar Veldkamp Lüksemburqda Aİ ölkələrinin XİN başçılarının planlı iclasının başlanmasından əvvəl jurnalistlərə bəyan edib.
Nazir vurğulayıb ki, Niderland İranın nüvə silahına sahib olmasının yolverilməzliyi barədə qəti mövqe tutur.
"Hesab edirik ki, bu məqsədə çatmağın ən yaxşı yolu diplomatiya və danışıqlardan keçir", - deyə o vurğulayıb.
Nazir əlavə edib ki, danışıqların Niderlandda keçiriləcəyi barədə şayiələr həqiqətə uyğun deyil.
"Bu Niderlandda deyil, bu Romada olacaq", - deyə o vurğulayıb.
ABŞ və İran arasında nüvə məsələsi ilə bağlı danışıqların növbəti raundu İtaliyanın paytaxtı Romada keçirilə bilər.
Oxu.Az-ın verdiyi məlumata görə, bu barədə "Axios" mənbələrə istinadən məlumat verib.
Bildirilir ki, ABŞ və İran rəsmilərinin görüşü şəxsi formatda keçirilə bilər.
"Oman vasitəçiləri də görüşdə iştirak edə bilərlər", - deyə mənbədən qeyd edilib.
O da vurğulanır ki, ikinci görüşdən əvvəl Atom Enerjisi üzrə Beynəlxalq Agentliyin (AEBA) baş direktoru Rafael Qrossi İrana gedəcək. Onun ölkədəki nüvə obyektlərində monitorinq və yoxlama prosedurlarını müzakirə edəcəyi gözlənilir.
Qeyd edək ki, danışıqların ilk mərhələsi bu il aprelin 12-si Omanda keçirilib. Bundan əvvəl ikinci mərhələnin də Omanda keçiriləcəyi güman edilirdi, lakin ABŞ tərəfi başqa məkan təklif edib.
