ABŞ Zaporojye AES ətrafındakı ərazini öz nəzarətinə almaq istəyir

ABŞ Zaporojye atom elektrik stansiyasına (ZAES) bitişik ərazilər üçün Vaşinqtonun nəzarəti altında neytral status yaratmaq imkanını nəzərdən keçirir. Bu addım Rusiya-Ukrayna münaqişəsinin həlli üçün şərtlərdən biri kimi nəzərdən keçirilir.

Oxu.Az-ın məlumatına görə, bu barədə "The Wall Street Journal" mənbələrə istinadən məlumat yayıb.

Mənbə təklif olunan zonanın konkret sərhədlərini, nəzarət formatını və ya stansiyanı kimin idarə edəcəyini açıqlamır.

Bildirilir ki, ideya gərginliyin azaldılması üçün kompromislərin axtarışı kontekstində müzakirə olunur, lakin texniki və siyasi detallar hələ də aydın deyil.

"Vaşinqton bu addımda gərginliyi azaltmaq imkanı görür, lakin təklifin əsas aspektləri hələ işlənməyib", - deyə mənbədən vurğulanıb.

Qeyd edək ki, aprelin 17-də Ukraynanın energetika naziri German Qaluşçenko bildirib ki, Kiyev Zaporojye AES-ə Birləşmiş Ştatlarla birlikdə nəzarət etməyə hazırdır.