ABŞ-nin Məxfi Xidməti mayın 23-də Ağ Ev yaxınlığında atəş açan şəxsi 2025-ci ildə ən azı iki dəfə saxlayıb.
Oxu.Az-ın "Fox News" telekanalına istinadən verdiyi xəbərə görə, atəş açmış 21 yaşlı Nesir Best Merilend ştatının sakini olub.
2025-ci il iyunun 26-da onu Məxfi Xidmətin agentlərini dayandırmağa cəhd etdiyinə və onlara qarşı təhdidlərə görə, iyulun 10-da isə qorunan əraziyə daxil olduğuna görə saxlamışdılar.
Daha əvvəl "The New York Post" qəzeti mənbələrə istinadən qeyd etmişdi ki, qaradərili şəxs ağır psixi pozuntulara malik olub və özünün İsa Məsih olduğuna inanırdı. Nəşr qeyd edirdi ki, daha əvvəl məhkəmə onun barəsində Ağ Evə yaxınlaşmağı qadağan edən qərar çıxarmışdı.
Xatırladaq ki, "Fox News" telekanalı mayın 23-də axşam saatlarında silahlı bir şəxsin Ağ Ev yaxınlığında atəş açmağa başladığını bildirmişdi.
ABŞ prezidentinin iqamətgahının mühafizəçiləri cavab atəşi açaraq onu zərərsizləşdiriblər. Məxfi Xidmət sonradan şübhəlinin xəstəxanada öldüyünü bildirib. Bundan əlavə, atışma zamanı yoldan təsadüfən keçən bir şəxs də yaralanıb. ABŞ Prezidenti Donald Tramp atışma zamanı Ağ Evdə olub. Atışma yerindən Ağ Evin ərazisinə olan məsafə təxminən 150 metr təşkil edir.
