ABŞ-nin realiti-şoularının 29 yaşlı ulduzu, ictimaiyyət arasında "Keş" kimi tanınan Makayla Peyc güllələnib.
Oxu.Az xəbər verir ki, bu barədə "ABC7 News" telekanalı məlumat yayıb.
Kanalın məlumatına əsasən, oktyabrın 11-i gecə saatlarında Kaliforniya ştatının Oklend şəhərinin hüquq-mühafizə orqanlarına atışma barədə siqnal daxil olub.
Hadisə yerinə gələn polislər Peyci odlu silahdan yaralanmış vəziyyətdə aşkar ediblər. Televiziya ulduzu təcili olaraq tibb müəssisəsinə çatdırılsa da, həkimlərin səylərinə baxmayaraq, onun həyatını xilas etmək mümkün olmayıb.
Bildirilir ki, polis artıq silahlı hücumda iştirakı ehtimal edilən bir qadını saxlayıb. Həmin şəxsin kimliyi hələlik ictimaiyyətə açıqlanmır. Peycin ailə üzvləri baş verən faciəni hələ də qəbul edə bilmədiklərini vurğulayıblar.
Qeyd edək ki, Makayla Peyc ABŞ-də "NowThatsTV" striminq platformasında yayımlanan "Gənc və ümidsiz" (Young & Reckless) eləcə də "Bax bu, qiyamdır" (Now That's Riot) realiti-şoularındakı iştirakı ilə məşhurluq qazanmışdı.
