Ermənistan parlamentinin spikeri Alen Simonyan gəlini Ani Qevorkyanın mənimsəmə işində günahını etiraf etməyə məcbur olduğunu bəyan edib. Məqsəd işin məhkəməyə çatması və proses ətrafında vəziyyətin sabitləşməsi olub.
Bu barədə Oxu.Az Ermənistan KİV-ə istinadən məlumat verib.
Nəşrə müsahibəsində Simonyan izah edib ki, bu qərar qardaşının ailəsi tərəfindən şüurlu şəkildə verilib.
"Bəli, siz haqlısınız. Qardaşımın ailəsi istintaqın gələcəkdə davam etməsi üçün bu yolu seçdi", - deyə o qeyd edib və işin sonda təqsirlilik hökmü ilə yekunlaşacağına şübhə duyduğunu bildirib.
Onun sözlərinə görə, hüquq-mühafizə orqanları tərəfindən səhvlərə yol verilən bir sıra digər hallarda olduğu kimi, bu iş də məhkəmədə "uğursuzluqla" nəticələnə bilər.
Nəşr qeyd edir ki, Simonyan faktiki olaraq hüquq-mühafizə orqanlarına meydan oxuyur və onların peşəkarlığını şübhə altına alır. Baş nazir Nikol Paşinyanın korrupsiyaya qarşı elan etdiyi mübarizə fonunda bu aspekt xüsusi maraq doğurur. Sual yaranır ki, yüksək vəzifəli məmur öz vəzifəsindən və nüfuzundan istintaq orqanlarına təzyiq etmək üçün istifadə edirmi?
Xatırladaq ki, 2024-cü ilin yanvarında iqtisadiyyat naziri Vaan Kerobyana, nazirliyin bir sıra əməkdaşlarına və özəl sektor nümayəndələrinə qarşı cinayət işi açılıb. Söhbət intensiv bağçılıq təsərrüfatının inkişafı proqramının icrası zamanı büdcə vəsaitlərinin mənimsənilməsi və şirkətlərin tenderlərdə iştirakına maneələrin yaradılmasından gedirdi.
Daha sonra səkkiz təqsirləndirilən şəxsdən altısı barəsində cinayət təqibinə peşmançılıq faktı əsasında xitam verilib. Kerobyanın özü və "Synergy" şirkətinin direktoru Aşot Ovannisyan isə öz günahlarını etiraf etməkdən boyun qaçırıblar.
