Sinqapurdakı Nanyanq Texnologiya Universitetinin alimləri kiborq tarakanlar üçün miniatür sualtı geyim hazırlayıblar. Bu geyim həşəratların üç saata qədər su altında qalmasına imkan verir və gələcəkdə onların fəlakət zonalarının, eləcə də Marsın səthinin tədqiqində istifadə olunması nəzərdə tutulur.
Oxu.Az "New Scientist"ə istinadən xəbər verir ki, geyim 3D-printerlə hazırlanıb və tarakanın tənəffüs dəliklərini sudan qoruyur.
Qurğuda hidrogen-peroksid və manqan-dioksidin reaksiyası nəticəsində yaranan oksigen həşəratın nəfəs almasını təmin edir.
Sınaqlarda tarakanlar 50 santimetr dərinlikdə su altında hərəkət edə biliblər və təcrübədən sonra sağlam qalıblar.
Layihə rəhbəri Hirotaka Sato bildirib ki, bu texnologiya kiborq tarakanlardan axtarış-xilasetmə əməliyyatlarında və gələcəkdə Marsın tədqiqində istifadəni mümkün edə bilər. Tədqiqatçılar növbəti mərhələdə kostyumları vakuum, radiasiya və ekstremal temperatur şəraitində sınaqdan keçirməyi planlaşdırırlar.
Qərbi İngiltərə Universitetinin alimi Alan Uinfild isə hesab edir ki, belə kiborq tarakanlar kiçik robotlardan daha səmərəlidir, çünki daha uzun müddət işləyə və enerji mənbəyindən asılı olmadan fəaliyyət göstərə bilirlər.
