Argentina Xarici İşlər Nazirliyi (XİN) Birləşmiş Millətlər Təşkilatının (BMT) baş katibi vəzifəsinə Rafael Qrossinin namizədliyini rəsmi olaraq təqdim edib.
Bu barədə Oxu.Az RG.ru nəşrinə istinadən məlumat verib.
Məlumata görə, xarici işlər naziri Pablo Kirno nazirliyin xüsusi qrup yaratdığını və bu qrupun onun üçün səslərin təmin edilməsi işlərinə cavabdeh olacağını bildirib. Uğur əldə ediləcəyi təqdirdə, hazırda Beynəlxalq Atom Enerjisi Agentliyinə (BAEA) rəhbərlik edən Qrossi tarixdə bu vəzifəni tutan ilk argentinalı ola bilər.
Nazir vurğulayıb ki, Xavyer Mileyin hökuməti Qrossinin BMT-nin baş katibi vəzifəsi üçün lazımi keyfiyyətlərə, o cümlədən sülhməramlı vəzifələri yerinə yetirmək qabiliyyətinə malik olduğunu qəbul edir. Kirno qeyd edib ki, onun seçki proqramının əsas komponentlərindən biri silahlı münaqişələrin həllində BMT-nin rolunu gücləndirmək olacaq. Bunu nəzərə alaraq, Kirno bildirib ki, Buenos-Ayres BMT Təhlükəsizlik Şurasının daimi üzvləri ilə əlaqələrin gücləndirilməsinə diqqət yetirməyi nəzərdə tutur ki, onların argentinalı namizədə dəstəklərini təmin etsin.
Rafael Qrossi, öz növbəsində, beynəlxalq ictimaiyyətə müraciət edərək, BMT-nin vəziyyətini dürüst təhlil etməyə və "təşkilatda çox şeyin düzgün işləmədiyini" etiraf etməyə çağırıb.
"Bizə qollarını çırmalayıb problemlərin olduğu yerə gedəcək baş katib lazımdır. Bizə lazımi islahatları aparmaq üçün cəsarət lazımdır", - deyə o qeyd edib.
