Avropa ölkələri yeni anomal istilərlə üzləşib.
Oxu.Az-ın xəbərinə görə, bu barədə Avropa İstilik Monitorinq Sistemi (EFFIS) məlumat yayıb.
Qeyd edilib ki, iyul ayında həddindən artıq istilik səbəbindən baş verən meşə yanğınları 126 000 hektardan çox ərazini məhv edib ki, bunlardan təxminən 40%-i İspaniyanın payına düşüb. Kataloniyada on minlərlə insan təxliyə edilib.
Portuqaliyanın mərkəzi hissəsində yanğınlar təxminən 13 000 hektar ərazini məhv edib ki, bu, cari ilin ən yüksək göstəricisidir.
Fransada yanmış ərazilərin sahəsi 25 000 hektara çatıb və bu da ötən illə müqayisədə iki dəfə çoxdur. Kontinental departamentlərin üçdə birində "qırmızı təhlükə" elan edilib.
Yanğınlar həmçinin Yunanıstan, Xorvatiya və Albaniyanı da əhatə edib.
London hakimiyyəti şəhər tarixində ilk dəfə olaraq ekstremal istiyə uyğunlaşma üzrə "Heat Ready London" planını təqdim edib. Mer Sadiq Xan vurğulayıb ki, ilk növbədə sakinlərin sağlamlığı qorunmalı, binalar istiyə uyğunlaşdırılmalı və iqtisadi, infrastruktur dayanıqlığının təmin edilməsi üçün tədbirlər görülməlidir.
Mütəxəssislər qeyd edirlər ki, Avropada meşə yanğınları mövsümünün piki adətən avqust-sentyabr aylarına təsadüf edir. Onlar hakimiyyət orqanlarını və əhalini bu təhlükəli dövrə əvvəlcədən hazırlaşmağa çağırırlar.
