Tailandın paytaxtı Banqkokun Latphrao rayonunda yerləşən barda baş vermiş güclü yanğın nəticəsində ölənlərin sayı 37-yə yüksəlib.
Oxu.Az xəbər verir ki, bu barədə "Thai PBS" telekanalı paytaxtın "Erawan" Təcili Tibbi Yardım Mərkəzinə istinadən məlumat yayıb.
Məlumata görə, hadisədən sonra xəstəxanalarda həyatını itirənlərin sayı 10-a çatıb. Hazırda 15 nəfərin müalicəsi davam edir. Onlardan 10-u reanimasiya şöbəsindədir.
Yanğın iyulun 12-dən 13-nə keçən gecə Banqkokda yerləşən məşhur Rong Beer Na Lat Phrao əyləncə məkanında baş verib.
İlkin araşdırmalara əsasən, yanğına səhnənin yaxınlığında yerləşən elektrik avadanlığının həddindən artıq yüklənməsi nəticəsində baş vermiş qısaqapanma səbəb olub. Alov və sıx tüstü qısa müddətdə bütün binaya yayılıb.
Hadisə zamanı çox sayda insan dəm qazından zəhərlənərək həyatını itirib. Yanğın nəticəsində 70-dən çox şəxs müxtəlif dərəcəli yanıq və digər xəsarətlər alıb.
